Անհանգիստ ոտքերի համախտանիշ

Անհանգիստ կամ «պարող» ոտքերի համախտանիշը բավականին հաճախ հանդիպող վիճակ է, որը դժվարացում է քուն մտնելը։

Սա ավելի շուտ նյարդային համակարգի հիվանդություն է, որն անկողին մտնելիս առաջացնում է ոտքերում տհաճության, անհարմարության կամ ծանրության զգացումներ և դրանք մեղմացնելու համար ոտքերը շարժելու և հարմար դիրք ընտրելու անհագ ցանկության, ինչն էլ խանգարում է քուն մտնելը։

«Անհանգիստ ոտքերի» պատճառները

Անհանգիստ ոտքերի համախտանիշի պատճառները մինչև վերջ բացահայտված չեն։ Սակայն կան որոշ փաստեր, որ այս վիճակի հիմքում կարող են ընկած լինել հետևյալ վիճակները՝

• շաքարային դիաբետ (շաքարախտ)
• երիկամների քրոնիկ հիվանդություններ
• երկաթ դեֆիցիտային անեմիա
• որոշ դեղերի ընդունում (օրինակ՝ հակափսիխոտիկներ կամ հակադեպրեսանտներ):

Հղիությունը կամ հորմոնային տեղաշարժերը կարող են ժամանակավորապես վատթարացնել անհանգիստ ոտքերի համախտանիշի գանգատները: Որոշ կանանց մոտ այս համախտանիշն առաջին անգամ ի հայտ է գալիս իրենց առաջին հղիության ժամանակ, հատկապես՝ վերջին եռամսյակում: Սակայն, ծննդաբերությունից հետո գանգատները սովորաբար անհետանում են:

«Անհանգիստ ոտքերի» ախտանիշները

Եթե ձեզ մոտ կա անհանգիստ ոտքերի համախտանիշ, դուք կարող եք նշել հետևյալ գանգատները՝

• ոտքերը շարժելու մշտական ցանկություն, քանի որ ձեր ոտքերում զգում եք տհաճ զգացողություններ՝ այրոց, ծակծկոց, ցավ, թմրածություն, ծանրության զգացում, «մաշկի վրա միջատների առկայություն»
• հատկապես անկողնում, ոտքերի դիրքը փոփոխող կտրուկ և անվերահսկելի շարժումներ
• երբեմն նման զգացողություն նաև ձեռքերում կամ մարմնի այլ շրջաններում։

Ընդ որում, այս նշաններն ուժեղանում են, երբ դուք հանգիստ և անշարժ վիճակում եք, օրինակ՝ փորձում եք քուն մտնել, և մեղմանում են, երբ դուք շարժում եք ձեր ոտքերը։

«Անհանգիստ ոտքերի» բուժումը

Եթե ձեզ մոտ առկա են վերևոնշյալ ախտանիշները, դիմեք ձեր բժշկին՝ ախտորոշումը ճշտելու համար։ Բժիշկը գուցե նշանակի որոշ, այդ թվում՝ արյան հետազոտություններ։

Ձեզ կարող են դեղեր նշանակվել, եթե «պարող ոտքերը» լրջորեն խանգարում են ձեր քունը, հետևաբար՝ բացասաբար ազդում ձեր ցերեկային առօրյա կյանքի վրա։

Դուք ինքներդ կարող եք մեղմել հիվանդության նշանները և բարելավել ձեր քունը, եթե հետևեք այս պարզ խորհուրդներին՝

• ընդունեք տաք ցնցուղ, ոտքերը տաքացնող կամ սառեցնող միջոցառումներ
• մերսեք ձեր ոտքերը (մասաժ)
• կրճատեք կոֆեինի ընդունումը (սուրճ, կոֆեին պարունակող ըմպելիքներ)
• կրճատեք ալկոհոլի ընդունումը (հատկապես երեկոյան ժամերին)
• դադարեցրեք ծխելը
• ձեզ համար մշակեք առողջ քնի սովորույթներ
• կառավարեք ձեր սթրեսը։

Բժիշկը կարող է նաև ձեզ ուղեգրել նյարդաբանի մոտ, ով գուցե ավելի մանրամասն հետազոտի ձեր վիճակի պատճառները և նշանակի որոշ դեղեր, այդ թվում՝

• գլխուղեղում դոպամինը շատացնող դեղեր (օրինակ՝ Ռոհիպնոլ, Ռոտիգոտին կամ Պրամիպեքսոլ)
• կալցիումական ուղիների վրա ազդող դեղեր (օրինակ՝ Գաբապենտին, Պրեգաբալին և այլն)
• մկանային ռելաքսանտներ և քնաբերներ (օրինակ՝ Մելատոնին)
• հազվադեպ՝ օփիոիդներ (օրինակ՝ Տրամադոլ, Կոդիեն, Օքսիկոդին կամ Հիդրոկոդոն):