Բուժում - Ռևմատոիդ արթրիտ

Ռևմատոիդ արթրիտը վերջնական բուժում չունի:

Սակայն կլինիկական ուսումնասիրությունները ցույց են տալիս, որ ախտանիշների հեռացումն ավելի հավանական է, երբ բուժումը վաղ է սկսվում դեղամիջոցներով, որոնք հայտնի են որպես հիվանդությունը ձևափոխող հակառևմատիկ դեղամիջոցներ (ՀՁՀՌԴ-ներ, անգլերեն՝ DMARDs):

Դեղորայքային բուժում

Ձեր բժշկի կողմից առաջարկվող դեղերի տեսակները կախված կլինեն ձեր ախտանիշների ծանրության աստիճանից և նրանից, թե որքան ժամանակ եք հիվանդ ռևմատոիդ արթրիտով:

• ՈՍՀԲԴ-ներ. ոչ ստերոիդ հակաբորբոքային դեղերը (ՈՍՀԲԴ-ներ) կարող են թեթևացնել ցավը և նվազեցնել բորբոքումը: Սովորական ՈՍՀԲԴ-ները ներառում են Իբուպրոֆեն (Ադվիլ, Մոտրին IB և այլ) և Նապրոքսեն նատրիում (Ալեվե): Ավելի ուժեղ ՈՍՀԲԴ-ները հասանելի են դեղատոմսով: Կողմնակի ազդեցությունները կարող են ներառել ստամոքսի գրգռվածություն, սրտի հետ կապված խնդիրներ և երիկամների վնասում:
• Ստերոիդներ. կորտիկոստերոիդ դեղամիջոցները, ինչպիսին է Պրեդնիզոնը, նվազեցնում են բորբոքումն ու ցավը և դանդաղեցնում հոդերի վնասումը: Կողմնակի ազդեցությունները կարող են ներառել ոսկորների փխրունացում, քաշի ավելացում և դիաբետ: Բժիշկները հաճախ նշանակում են կորտիկոստերոիդներ ախտանշանները արագ թեթևացնելու համար՝ նպատակ ունենալով աստիճանաբար նվազեցնել դեղորայքի դեղաչափը:
• Սովորական (բազիսային) ՀՁՀՌԴ-ներ. այս դեղամիջոցները կարող են դանդաղեցնել ռևմատոիդ արթրիտի զարգացումը և փրկել հոդերը և այլ հյուսվածքները անդառնալի վնասից: Ավելի հաճախ նշանակվող ՀՁՀՌԴ-ները ներառում են Մետոտրեքսատ (Տրեքսալ, Օտրեքսուպ և այլն), Լեֆլունոմիդ (Արավա), Հիդրօքսիքլորոխին (Պլաքվենիլ) և Սուլֆասալազին (Ազուլֆիդին): Կողմնակի ազդեցությունները տարբեր են, սակայն կարող են ներառել լյարդի վնասումը և ծանր թոքային վարակները:
• Կենսաբանական նյութեր (բիոլոջիկներ). հայտնի են նաև որպես կենսաբանական արձագանքի ձևափոխիչներ: ՀՁՀՌԴ-ների այս նոր դասը ներառում է Աբատասեպտ (Օրենսիա), Ադալիմումաբ (Հումիրա), Անակինրա (Կիներետ), Ցերտոլիզումաբ (Սիմզիա), Էտաներցեպտ (Էնբրել), Գոլիմումաբ (Սիմպոնի), Ինֆլիքսիմաբ (Ռեմիկադ), Ռիտուկսիմաբ ( Ռիտուքսան), Սարիլումաբ (Կևզարա) և Տոսիլիզումաբ (Ակտեմրա): Կենսաբանական ՀՁՀՌԴ-ները սովորաբար առավել արդյունավետ են, երբ զուգակցվում են սովորական ՀՁՀՌԴ-ի հետ, ինչպիսին է Մետոտրեքսատը: Այս տեսակի դեղամիջոցները նույնպես մեծացնում են վարակների ռիսկը:
• Թիրախային սինթետիկ ՀՁՀՌԴ-ներ. Բարիսիտինիբը (Օլումիանտ), Տոֆասիտինիբը (Քսելյանզ) և Ուպադասիտինիբը (Ռինվոք) կարող են օգտագործվել, եթե սովորական ՀՁՀՌԴ-ները և կենսաբանական նյութերն արդյունավետ չեն եղել: Տոֆասիտինիբի ավելի բարձր չափաբաժինները կարող են մեծացնել թոքերում արյան մակարդուկի (թոքային էմբոլիայի), ծանր սրտային պատահարների և քաղցկեղի ռիսկը:

Թերապիա (ոչ դեղորայքային բուժում)

Ձեր բժիշկը կարող է ձեզ ուղեգրել ֆիզիկական կամ մասնագիտական թերապևտի մոտ, ով կարող է ձեզ վարժություններ սովորեցնել, որոնք կօգնեն ձեր հոդերը ճկուն պահելուն: Թերապևտը նաև կարող է առաջարկել ամենօրյա առաջադրանքները կատարելու նոր մեթոդներ, , որոնք ավելի հեշտությամբ կտարվեն ախտահարված հոդերի կողմից: Օրինակ, դուք կարող եք վերցնել մի առարկա, օգտագործելով ձեր նախաբազուկները:

Օժանդակող սարքերը կարող են հեշտացնել ձեր ցավոտ հոդերի լարվածությունից խուսափելը: Օրինակ, ձեռքի բռնակ ունեցող խոհանոցային դանակն օգնում է պաշտպանել ձեր մատերի և դաստակի հոդերը: Որոշ միջոցներ, ինչպիսիք են կեռիկները, կարող են հեշտացնել հագնվելը: Կատալոգները և բժշկական պարագաների խանութները լավ վայրեր են ձեզ օգնող հարմարանքներ գտնելու համար:

Վիրահատություն

Եթե դեղամիջոցները չեն կարողանում կանխել կամ դանդաղեցնել հոդերի վնասումը, դուք և ձեր բժիշկը կարող եք դիտարկել վնասված հոդերը վերականգնելու վիրահատություն: Վիրահատությունը կարող է օգնել վերականգնելու ձեր հոդն օգտագործելու կարողությունը: Այն կարող է նաև նվազեցնել ցավը և բարելավել ախտահարված հոդի գործառույթը:

Ռևմատոիդ արթրիտի վիրահատությունը կարող է ներառել հետևյալ միջամտություններից մեկնումեկը կամ մի քանիսը:

• Սինովէկտոմիա. հոդի բորբոքված լորձաթաղանթը (սինովիում) հեռացնելու վիրահատությունը կարող է օգնել ցավի նվազեցմանը և հոդի ճկունության բարելավմանը:
• Ջլի վերականգնում. բորբոքումն ու հոդերի վնասումը կարող են հանգեցնել ձեր հոդի շուրջ ջիլերի թուլացման կամ պատռման: Ձեր վիրաբույժը կարող է վերականգնել վնասված ջիլերը:
• Արթրոդեզ. հոդի վիրաբուժական միաձուկումը կարող է առաջարկվել հոդը կայունացնելու կամ համաչափեցնելու և ցավը թեթևացնելու համար, երբ հոդերի փոխարինումը տարբերակ չէ:
• Հոդերի ամբողջական փոխարինում. հոդերի փոխարինման վիրահատության ժամանակ ձեր վիրաբույժը հեռացնում է ձեր հոդի վնասված հատվածները և տեղադրում է պրոթեզ՝ պատրաստված մետաղից և պլաստիկից: