Գրադարան
Սկոլիոզ
2 րոպե
Սկոլիոզը ողնաշարի կողմնային (դիմային հարթությունում) ուռուցիկ կորացումն է, որը կարող է զուգորդվել ողների ոլորմամբ:
Այն կարող է հանդիպել ցանկացած տարիքում, սակայն հակված է սկսվելու մանկական և դեռահաս տարիքում: Սկոլիոզը կարող է առանց որևէ բուժման որոշակիորեն շտկվել, սակայն նաև կարող է ժամանակի ընթացքում ավելի վատթարանալ: Սկոլիոզով մարդիկ պետք է պարբերաբար այցելեն իրենց բժշկին, որ ստուգեն հիվանդության հնարավոր զարգացումը:
Սկոլիոզի առաջացման պատճառները
Դեպքերի մեծ մասում սկոլիոզի պատճառն անհայտ է, և ողնաշարի ախտաբանական կորացում սկսվում է որևէ առողջական խնդիր չունեցող երեխաների մոտ:
Որոշ դեպքերում սկոլիոզը ժառանգական է և առկա է ի ծնե: Երբեմն սկոլիոզի կարող են բերել նյարդամկանային այնպիսի խնդիրներ, ինչպիսիք են մանկական ուղեղային կաթվածը կամ մկանային դիստրոֆիան:
Սկոլիոզի ախտանիշները
Եթե ունեք սկոլիոզ, կարող եք նշել՝
- անհամաչափ (ոչ սիմետրիկ) ուսեր
- իրանի վրա ոչ համաչափ (ոչ սիմետրիկ) ծալքեր
- միմյանցից բարձր-ցածր թիակներ
- միմյանցից բարձր-ցածր կոնքեր
- ողնաշարի ցայտուն դրսևորված կորություն
- մեջքի շրջանի ցավեր (կախված տեղակայումից՝ թիկունքը կամ գոտկային շրջանն ընդգրկող) կամ անհարմարավետության զգացում (դիսկոմֆորտ):
Ծանր աստիճանի սկոլիոզով մարդիկ ունեն մարմնի արտասովոր կամ անհամաչափ կեցվածք: Կառուցվածքային կոպիտ փոփոխությունները կարող են առաջացնել սրտանոթային, շնչառական, մարսողական և այլ համակարգերի գործունեության խախտումներ։
Եթե կարծում եք, որ ձեր երեխան կարող է ունենալ սկոլիոզ, ապա այցելեք ձեր մանկաբույժին: Վաղ ախտորոշումը և բուժումը շատ կարևոր են:
Սկոլիոզը ողնաշարի ոչ նորմալ կամ չափից դուրս կորությունն է
Ախտորոշում
Ձեր բժիշկը կարող է սկոլիոզն ախտորոշել միայն զննելով ձեզ կամ ձեր երեխային:
Եթե բժիշկը կարծում է, որ դուք կամ ձեր երեխան ունեք սկոլոզ, նա ձեզ կարող է ուղեգրել օրթոպեդիկ մասնագետի խորհրդատվության: Վերջինս ձեզ կամ ձեր երեխային զննելուց հետո կարող է նշանակել որոշ հետազոտություններ, օրինակ՝ ռենտգեն պատկերում, համակարգչային տոմոգրաֆիա (ԿՏ) կամ մագնիսա-ռեզոնանսային տոմոգրաֆիա (ՄՌՏ):
Սկոլիոզի բուժումը
Բուժումը սովորաբար նպատակաուղղված է ամրապնդելու ողնաշարը, որ բարելավվի ձեր կամ երեխայի կեցվածքը: Բուժման մեթոդի ընտրությունը կախված է տարիքից և սկոլիոզի ծանրության աստիճանից:
Սկոլիոզի դեպքերի մեծ մասը թեթև աստիճանի է, որը լրացուցիչ հետազոտություն կամ բուժում գուցեև չպահանջի: Եթե սկոլիոզն ավելի արտահայտված է, կարող է առաջանալ կանոնավոր ստուգման անհրաժեշտություն:
Եթե այն շատ ավելի արտահայտված է, բուժումը կարող է ներառել օրթոպեդիկ ուղղման մեթոդներից շտկող սեղմիրան (կորսետ) հագնելը, որը կարող է օգնել ողնաշարի հետագա կորացման կանխարգելմանը:
Որոշ մարդկանց սկոլիոզն այնքան արտահայտված է, որ կարող է առաջարկվել վիրահատություն` մետաղական սողանների միջոցով ողնաշարի ամրացում կամ որոշ ոսկրերի միաձուլում (ողնաշարի անկիլոզացում):
Բուժական վարժանքները և ֆիզիոթերապիան կարող են մեղմացնել ցավերը: Բժիշկը տալ կարող է խորհուրդ ուղղիչ վարժություններ, բուժական մերսում կամ բուժական լող:
Հոգեբանական աջակցություն
Սկոլիոզով երեխաները կամ դեռահասները, ովքեր շտկող սեղմիրան (կորսետ) կրելու կարիք ունեն կամ վիրահատվել են, հավանաբար ունեն ինքնագնահատման հետ կապված խնդիրներ: Նման դեպքերում հուզական աջակցությունը կարող է օգտակար լինել:
Հոդվածը տեղադրվել է՝ 19-04-2020 վերանայվել է՝ 19-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
