Գրադարան

Սկոլիոզ. բուժում

Սկոլիոզ. բուժում

Time Read 2 րոպե

Սկոլիոզի բուժումը տարբեր է՝ կախված կորության չափից:

Երեխաները, ովքեր ունեն շատ թեթև կորություններ, սովորաբար որևէ բուժման կարիք չունեն, թեև կարող են կանոնավոր ստուգումների կարիք ունենալ՝ տեսնելու, թե արդյոք սկոլիոզը տարիքի հետ վատթարանում է:

Սեղմիրանը (կորսետ) կամ վիրահատությունը կարող է անհրաժեշտ լինել, եթե ողնաշարի կորությունը չափավոր կամ մեծ է: Նման դեպքերում բժիշկները հաշվի են առնում հետևյալ գործոնները:

  • Հասունություն. եթե երեխայի ոսկորների աճը դադարել է, կորության զարգացման ռիսկը ցածր է: Սա նաև նշանակում է, որ կորսետներն առավել արդյունավետ են այն երեխաների մոտ, որոնց ոսկորները դեռ աճում են: Ոսկրերի հասունությունը կարելի է ստուգել դաստակի ռենտգենով։
  • Կորության չափը. ավելի մեծ կորություններն ավելի հավանական է, որ ժամանակի ընթացքում վատթարանան:
  • Սեռ. աղջիկների մոտ սկոլիոզի վատթարացման ռիսկը շատ ավելի բարձր է, քան տղաների մոտ:

Եթե ձեր երեխան ունի միջին ծանրության սկոլիոզ, և ոսկորները դեռ աճում են, ձեր բժիշկը կարող է խորհուրդ տալ կորսետի կրում: Սա չի բուժում սկոլիոզը կամ չի ուղղում արդեն առաջացած կորությունը, սակայն հաճախ կանխում է սկոլիոզի վատթարացումը:

Կորսետների ամենատարածված տեսակը պատրաստված է պլաստիկից և ուրվագծված է իրանին համապատասխանելու համար: Այս կորսետը գրեթե անտեսանելի է հագուստի տակ, քանի որ տեղավորվում է թևերի տակ և կրծքավանդակի, գոտկատեղի և ազդրերի շուրջը:

Կորսետների մեծ մասը կրում են օրական 13-ից 16 ժամվա ընթացքում: Դրանց արդյունավետությունը մեծանում է օրվա ընթացքում կրելու ժամերի քանակի հետ: Երեխաները, ովքեր կրում են կորսետներ, սովորաբար կարող են մասնակցել առօրյա գործերի մեծ մասին և ունեն քիչ սահմանափակումներ: Անհրաժեշտության դեպքում երեխան կարող է հանել կորսետը սպորտով կամ այլ ֆիզիկական գործունեության մասնակցելու համար:

Կորսետների օգտագործումը դադարեցվում է, երբ երեխայի հասակի հետագա փոփոխությունները դադարում են: Միջին հաշվով, աղջիկներն իրենց աճն ավարտում են 14 տարեկանում, իսկ տղաները՝ 16 տարեկանում, սակայն այսպիսի տարիքային վերջնաժամկետները ունեն անհատական զգալի տատանումներ:

Վիրահատություն

Ծանր սկոլիոզը սովորաբար զարգանում է ժամանակի ընթացքում, ուստի ձեր բժիշկը կարող է առաջարկել վիրահատություն, որը կարող է օգնել կորության ուղղմանը և հետագա վատթարացման կանխարգելմանը:

Վիրաբուժական տարբերակները ներառում են հետևյալը:

  • Ողների միաձուլում (ողնաշարի անկիլոզացում). այս միջամտության դեպքում վիրաբույժը միաձուլում է ողնաշարի երկու կամ ավելի ոսկորները, որոնք կոչվում են ողներ, որ դրանք չկարողանան անկախ շարժվել: Նման դեպքերում ողների միջև տեղադրվում են ոսկորի կտորներ կամ ոսկրանման նյութ։ Մետաղական ձողերը, կեռիկները, պտուտակները կամ մետաղալարերը պահում են ողնաշարի այդ հատվածը ուղիղ և անշարժ՝ մինչ հին և նոր ոսկրային նյութը միաձուլվի:
  • Երկարացող ձող (սողան). եթե սկոլիոզը երիտասարդ տարիքում արագ է զարգանում, վիրաբույժը կարող է ողնաշարի երկայնքով տեղադրել մեկ կամ երկու երկարացող մետաղական սողաններ, որոնք կարող են իրենց երկարությունը հարմարեցնել երեխայի աճին: Ձողերը երկարացնում են 3-6 ամիսը մեկ վիրահատության կամ կլինիկայում հեռակառավարման վահանակի միջոցով:
  • Ողների մարմինների կապակցում (ֆիքսում). այս միջամտությունը կարող է իրականացվել փոքր կտրվածքների միջոցով: Ողնաշարի կորի արտաքին եզրի երկայնքով տեղադրվում են պտուտակներ, և ամուր, ճկուն լարը պտտվում է պտուտակների միջով: Երբ լարը սեղմվում է, ողնաշարը ուղղվում է: Երբ երեխան մեծանում է, ողնաշարը կարող է էլ ավելի ուղղվել:

Ողնաշարի վիրահատությունների բարդություններից են արյունահոսությունը, վարակը կամ նյարդի վնասումը:

Հոգեբանական աջակցություն

Սկոլիոզով երեխաները կամ դեռահասները, ովքեր ունեն օրվա մեծ մասը շտկող սեղմիրան (կորսետ) կրելու կարիք կամ վիրահատվել են, հավանաբար ունեն ինքնագնահատման հետ կապված խնդիրներ: Նման դեպքերում հուզական աջակցությունը կարող է օգտակար լինել:

Հոդվածը տեղադրվել է՝ 20-12-2023 վերանայվել է՝ 20-12-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով