Գրադարան
Սպեցիֆիկ ֆոբիաներ. բուժում
2 րոպե
Սպեցիֆիկ կամ հատուկ ֆոբիաների լավագույն բուժումը հոգեթերապիայի ձևերից մեկն է, որը կոչվում է էքսպոզիցիոն թերապիա:
Որոշ դեպքերում բժիշկը նաև կարող է առաջարկել թերապիայի այլ տեսակներ կամ դեղամիջոցներ: Ֆոբիայի պատճառի ըմբռնումը իրականում ավելի քիչ կարևոր է, քան ժամանակի ընթացքում զարգացած խուսափողական վարքագծերի բուժման վրա կենտրոնանալը:
Բուժման նպատակն է բարելավել կյանքի որակը, որ դուք այլևս չսահմանափակվեք ձեր վախերով: Երբ դուք սովորեք, թե ինչպես ավելի լավ կառավարել և վերաբերվել ձեր արձագանքներին, մտքերին և զգացմունքներին, կնկատեք, որ ձեր անհանգստությունն ու վախը նվազում են և այլևս չեն վերահսկում ձեր կյանքը: Բուժումը սովորաբար ուղղված է միաժամանակ մեկ հատուկ ֆոբիայի վրա:
Հոգեթերապիա
Հոգեկան առողջության մասնագետի հետ զրուցելը կարող է օգնել ձեզ կառավարելու ձեր սպեցիֆիկ ֆոբիան: Էքսպոզիցիոն թերապիան և կոգնիտիվ-վարքաբանական թերապիան ամենաարդյունավետ բուժումներն են:
- Էքսպոզիցիոն թերապիա. թերապիայի այս տեսակը կարևորում է վախի գործոն հանդիսացող առարկայի կամ իրավիճակի նկատմամբ ձեր պատասխանի աստիճանական փոփոխումը, այլ կերպ ասած՝ վախի գոծոնին ընտելացումը: Վախի աղբյուրի և դրա հետ կապված մտքերի, զգացողությունների և զգացումների կրկնվող և աստիճանաբար ուժեղացվող ազդեցությունները կարող են օգնել ձեր տագնապների երկրորդ պլան մղվելուն: Օրինակ, եթե դուք վախենում եք վերելակ նստելուց, նախ դրա նկարները դիտելը, այնուհետև՝ վերելակին մոտենալը, մի ոտքը վերելակի մեջ դնելը և աստիճանաբար մեկ հարկ, հետո՝ ավելի երկար բարձրանալը, վերջում՝ տարբեր մարդկանց հետ վերելակ նստելը կարող են աստիճանաբար «կոտրել» անհաղթահարելի թվացող վախը:
- Կոգնիտիվ-վարքաբանական թերապիա (ԿՎԹ). ԿՎԹ-ն ներառում է էքսպոզիացիան՝ զուգակցված վախի գործոն հանդիսացող առարկայի կամ իրավիճակի քննման և դիմակայման այլ հնարքներ: Դուք սովորում և ամրապնդում եք ձեր վախերի և մարմնական զգացողությունների վերաբերյալ այլընտրանքային համոզմունքներ և այն, թե ինչպես են դրանք ազդում ձեր առօրյա կյանքի վրա: ԿՎԹ-ն կարևորում է ուսուցումը, որը թույլ է տալիս զարգացնել ձեր մտքերի և զգացողությունների կառավարման հմտություններ և ինքնավստահություն:
Դեղորայքային բուժում
Ընդհանուր առմամբ էքսպոզիցիոն թերապիան հաջող կերպով բուժում է սպեցիֆիկ ֆոբիաները: Այնուամենայնիվ, երբեմն դեղամիջոցները կարող են օգնել տագնապի և խուճապի ախտանիշների մեղմացմանը, որոնք ի հայտ են գալիս, երբ դուք մտածում եք վախի գործոնի մասին կամ ենթարկվում եք դրա ազդեցությանը:
Դեղամիջոցները կարող են օգտագործվել բուժման սկզբում կամ կարճատև՝ հատուկ և հազվադեպ հանդիպող իրավիճակներում, օրինակ՝ ինքնաթիռով ուղևորություն, հանրային ելույթ կամ ՄՌՏ հետազոտությունից առաջ:
- Բետա-պաշարիչներ (բլոկատորներ). այս դեղամիջոցները արգելափակում են ադրենալինի խթանիչ ազդեցությունները, օրինակ՝ վախով և տագնապով պայմանավորված արագացած սրտազարկ և սրտխփոցի զգացում, արյան ճնշման բարձրացում, ձայնի և վերջույթների դող և այլն:
- Հանգստացնողներ (սեդատիվներ). բենզոդիազեպինային շարքի դեղամիջոցներն ունեն տագնապամարիչ (անքսիոլիտիկ) ազդեցություն և կարող են օգնել ձեր ներքին լարվածության թուլացմանը: Այնուամենայնիվ, այս դեղամիջոցները պետք է օգտագործել զգուշությամբ, քանի որ այլ կողմնակի ազդեցություններից բացի ունեն կախվածություն առաջացնելու ունակություն: Բենզոդիազեպիններից պետք է հրաժարվել նաև այն դեպքերում, եթե ունեք ալկոհոլային կամ թմրամիջոցներից կախվածության պատմություն:
Հոդվածը տեղադրվել է՝ 04-05-2021 վերանայվել է՝ 12-04-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
