Ստրեպտոկոկային ֆարինգիտ. բուժում

1 րոպե

Կան դեղամիջոցներ, որոնք կարող են բուժել կոկորդի ստրեպտոկոկային վարակը, թեթևացնել ախտանիշները և կանխարգելել դրա բարդություններն ու տարածումը:

Հակաբիոտիկներ

Եթե ձեր բժիշկը ձեզ կամ ձեր երեխային ախտորոշի կոկորդի ստրեպտոկոկային վարակ, հավանաբար, կնշանակի բերանային ընդունման (օրալ) հակաբիոտիկ: Եթե հակաբիոտիկները ընդունվեն հիվանդության սկզբից 48 ժամվա ընթացքում, կնվազեցնեն ախտանիշների տևողությունը և սրությունը, ինչպես նաև բարդությունների ռիսկը և մյուսներին վարակի փոխանցման հավանականությունը:

Բուժման դեպքում դուք կամ ձեր երեխան պետք է ավելի լավ զգաք մեկ-երկու օրվա ընթացքում: Զանգեք ձեր բժշկին, եթե 48 ժամ հակաբիոտիկներ ընդունելուց հետո բարելավում չկա:

Հակաբիոտիկ ընդունող երեխաները, ովքեր իրենց լավ են զգում և հաճախ ջերմություն չունեն, կարող են վերադառնալ դպրոց կամ մսուր-մանկապարտեզ, երբ այլևս վարակիչ չեն, սովորաբար բուժումը սկսելուց 24 ժամ հետո: Բայց համոզվեք, որ ավարտեք նշանակված դեղորայքային բուժման ամբողջ կուրսը: Վաղ դադարեցումը կարող է հանգեցնել ախտադարձերի (ռեցիդիվներ) և լուրջ բարդությունների, ինչպիսիք են ռևմատիզմը կամ երիկամների բորբոքումը:

Ախտանիշները թեթևացնող միջոցներ

Կոկորդի ցավը թեթևացնելու և ջերմությունը նվազեցնելու համար փորձեք դեղատոմս չպահանջող ցավազրկողներ, ինչպիսիք են Իբուպրոֆենը (Ադվիլ, Մոտրին IB և այլն) կամ Ացետամինոֆենը (Պարացետամոլ, Թայլենոլև այլն):

Զգույշ եղեք երեխաներին կամ դեռահասներին Ասպիրին տալիս: Չնայած Ասպիրինը հաստատված է 3 տարեկանից բարձր երեխաների օգտագործման համար, ջրծաղիկից կամ գրիպանման ախտանիշներից վերականգնվող երեխաները և դեռահասները երբեք չպետք է Ասպիրին ընդունեն: Դա պայմանավորված է նրանով, որ Ասպիրինը կապված է Ռեյի համախտանիշի հետ, որը նման երեխաների մոտ հազվադեպ, բայց հնարավոր կյանքին սպառնացող վիճակ է: