Ախտորոշում - Սուիցիդ

Ձեր բժիշկը կարող է կատարել ֆիզիկական քննություն (բուժզննում) և առաջարկել հարցաթերթիկների լրացում կամ խորացված հարցազրույցներ՝ ուղղված են ձեր մտավոր և ֆիզիկական առողջության վերաբերյալ կարևոր մանրամասների բացահայտմանը:

Այս տեղեկատվությունը կարող է օգնել պարզելու, թե որն է ձեր ինքնասպանության մտքերի հիմքում ընկած պատճառը և որոշելու, թե որն է ձեր իրավիճակում լավագույն բուժումը:

Ձեր վիճակի գնահատումները կարող են ներառել հետևյալը:

• Հոգեկան առողջության խնդիրներ. շատ դեպքերում ինքնասպանության մտքերը կապված են հոգեկան առողջության որևէ բուժելի խնդրի հետ: Եթե ​​դա այդպես է, ձեզ կարող է անհրաժեշտ լինել հանդիպել ու զրուցել այնպիսի բժշկի հետ, որը մասնագիտացած է հոգեկան հիվանդությունների ախտորոշման և բուժման մեջ (հոգեբույժ) կամ այցելել հոգեկան առողջության այլ մասնագետի:
• Ֆիզիկական առողջության խնդիրներ. որոշ դեպքերում ինքնասպանության մտքերը կարող են կապված լինել ֆիզիկական առողջական խնդրի հետ: Ձեզ կարող է անհրաժեշտ լինել արյան թեստեր և այլ հետազոտություններ՝ պարզելու, թե արդյոք դա այդպես է:
• Ալկոհոլի և թմրամիջոցների չարաշահում. բազմաթիվ դեպքերում ալկոհոլը կամ թմրամիջոցները դեր են խաղում ինքնասպանության մտքերի առաջացման և ավարտված ինքնասպանության մեջ: Ձեր բժիշկը կցանկանա իմանալ, թե արդյոք դուք ունեք ալկոհոլի կամ թմրամիջոցների օգտագործման հետ կապված որևէ խնդիր, օրինակ՝ դրանց օգտագործումը նվազեցնելու կամ ինքնուրույն թողնելու անկարողություն: Ինքնասպանություն զգացող շատ մարդիկ ունեն կախվածություն առաջացնող այս նյութերից ձերբազատվելու օգնության կարիք: Նման իրավիճակներում ճիշտ և ժամանակին բուժումը կարող է կրճատել ինքնասպանություն գործելու զգացումները:
• Դեղորայք. որոշ մարդկանց մոտ դեղատոմս պահանջող կամ ազատ վաճառվող որոշ դեղամիջոցներ կարող են առաջացնել ինքնասպանության մտքեր: Տեղեկացրեք ձեր բժշկին ձեր ընդունած դեղերի մասին, որ նա պարզի, թե արդյոք դրանք կարող են կապված լինել ձեր տրամադրության անկման հետ:

Երեխաներ և դեռահասներ

Ինքնասպանության մտքեր ունեցող երեխաները սովորաբար պետք է դիմեն հոգեբույժի կամ հոգեբանի, ով փորձառու է հոգեկան առողջության խնդիրներ ունեցող երեխաների ախտորոշման և բուժման մեջ: Բացի նրանց հետ խնդիրը քննարկելուց, բժիշկը կցանկանա ճշգրիտ պատկերացում կազմել իրական վիճակի մասին՝ տեղեկություններ ստանալով տարբեր աղբյուրներից, ինչպիսիք են ծնողները կամ խնամակալները, երեխայի կամ դեռահասի հետ մտերիմ ընկերները, ուսուցիչները և նախկին բժշկական կամ հոգեբուժական գնահատումները: