Ինքնասպանություն. ախտանիշներ

2 րոպե

Ինքնասպանության (սուիցիդի) նախազգուշացնող նշանները կամ ինքնասպանության մտքերը ներառում են հետևյալը:

• Կյանքին վերջ տալու մասին խոսելը, օրինակ՝ «ես կսպանեմ ինքս ինձ», «երանի մեռած լինեի» կամ «երանի ծնված չլինեի» արտահայտություններ անելը:
• Ինքնասպանության միջոցներ ձեռք բերելը, օրինակ՝ ատրճանակ գնելը կամ դեղահաբեր կուտակելը:
• Հանրային շփումներից դուրս գալը, սոցիալական մեկուսացումը և մենակ մնալու ցանկությունը:
• Տրամադրության տատանումներ ունենալը, օրինակ՝ մի օր հուզական վերելք զգալը, իսկ հաջորդ օրը՝ խորապես հուսալքված լինելը:
• Մահվան, մահանալու կամ բռնության մտքերով ծանրաբեռնված լինելը:
• Իրավիճակի հետ կապված անելանելիության կամ հուսահատության զգացումներով լցվելը:
• Ալկոհոլի կամ ապօրինի թմրամիջոցների օգտագործման ավելացում:
• Առօրյա, ներառյալ՝ ուտելու կամ քնելու սովորույթների ռեժիմի փոփոխություններ:
• Ռիսկային կամ ինքնաոչնչացնող արարքներ կատարելը, օրինակ՝ ապօրինի թմրամիջոցներ օգտագործելը կամ ավտոմեքենան անզգույշ վարելը:
• Անձնական իրերից ազատվելը կամ գործերը կարգի բերելը, երբ դա անելու այլ տրամաբանական բացատրություն չկա:
• Մարդկանց հրաժեշտ տալն այնպես, կարծես այլևս էլ չեն հանդիպելու:
• Անհատականության փոփոխությունների զարգացում, խիստ անհանգստություն կամ դյուրագրգռություն, հատկապես վերոնշյալ որոշ նախազգուշական նշանների առկայության դեպքում:

Նախազգուշացնող նշանները միշտ չէ, որ ակնհայտ են, և դրանք կարող են տարբերվել անձից անձից: Ոմանք իրենց մտադրությունների մասին պարզ արտահայտվում են, իսկ մյուսները գաղտնի են պահում իրենց ինքնասպանության մտքերն ու զգացմունքները:

Ե՞րբ դիմել բժշկին

Եթե ​​ինքնասպանության ցանկություն ունեք, սակայն չեք մտածում անմիջապես ինքներդ ձեզ վնաս պատճառելու մասին՝

• շփվեք ձեր մտերիմ ընկերոջ կամ սիրելիի հետ, թեև դժվար է խոսել ձեր հույզերի ու մտքերի մասին
• կապ հաստատեք հոգևոր սպասավորի կամ ձեր հավատքի համայնքից որևէ մեկի հետ
• զանգահարեք ինքնասպանության թեժ գիծ (եթե այդպիսին կա)
• պայմանավորվեք և այցելեք ձեր բժշկին, այլ բուժաշխատողի կամ հոգեկան առողջության մասնագետին:

Ինքնասպանության մտքերը հաճախ ինքնուրույն չեն վերանում, ուստի առանց վարանելու օգնություն խնդրեք: