Ախտանիշներ - Արևայրուք

Արևայրուքի գանգատներն ու ախտանիշները կարող են ներառել հետևյալը:

• Բորբոքված մաշկ, որը սպիտակ մաշկի վրա ունի վարդագույն կամ կարմիր տեսք և կարող է ավելի դժվարությամբ երևալ շագանակագույն կամ սև մաշկի վրա
• մաշկ, որը շոշափելիս տաք կամ խիստ տաք է
• ցավ, ցավոտություն և քոր
• այտուցվածություն
• փոքր, հեղուկով լցված բշտիկներ (վկայում է երկրորդ աստիճանի այրվածքի մասին), որոնք կարող են պատռվել և հոսել
• գլխացավ, ջերմություն, սրտխառնոց և հոգնածություն, եթե արևայրուքը ծանր է
• աչքերում ցավ կամ ավազահատիկի զգացողություն:

Մարմնի ցանկացած բաց հատված, ներառյալ ականջի բլթակները, գլխամաշկը և շրթունքները, կարող են այրվել: Նույնիսկ ծածկված շրջանները կարող են այրվել, եթե, օրինակ, հագուստն ունի նոսր գործվածք, որը չի կանխում ուլտրամանուշակագույն (ՈւՄ) ճառագայթների թափանցումը: Աչքերը և կոպերը, որոնք չափազանց զգայուն են արևի ուլտրամանուշակագույն լույսի նկատմամբ, նույնպես կարող են այրվել:

Արևայրուկի ախտանիշները հաճախ հայտնվում են արևի տակ մնալուց մի քանի ժամվա ընթացքում, իսկ ուժեղ արևի կամ զգայուն մաշկի դեպքում՝ մինչև 15 րոպեում:

Մի քանի օրվա ընթացքում մարմինը կարող է սկսել ինքնուրույն ապաքինվել՝ մաքրելով վնասված մաշկի վերին շերտը: Ուժեղ արևայրուքը կարող է մի քանի օր շարունակվել՝ մինչև ապաքինվելը: Մաշկի գույնի ցանկացած ձգձվող փոփոխություն սովորաբար ժամանակի ընթացքում անհետանում է:

Ե՞րբ դիմել բժշկին

Այցելեք ձեր բժշկին, եթե դուք՝

• ունեք մեծ բշտիկներ
• ունեք բշտիկներ դեմքի, ձեռքերի կամ սեռական օրգանների վրա
• ունեք տուժած տարածքի ուժեղ այտուցվածություն
• ունեք վարակի նշաններ, ինչպիսիք են թարախային բշտիկները կամ բծերը
• ունեք ցավի սաստկացում, գլխացավ, շփոթվածություն, սրտխառնոց, ջերմություն կամ դող
• ավելի վատ եք զգում, չնայած տնային խնամքին
• ունեք աչքի ցավ կամ տեսողության խանգարումներ:

Զանգեք 1-03 և կանչեք շտապ օգնություն կամ դիմեք անհետաձգելի բուժօգնության, եթե ստացել եք արևայրուք և ունեք՝

• 39.4 °C (103 F) և ավելի բարձր ջերմություն՝ փսխումով
• շփոթվածություն
• շփոթվածություն
• ջրազրկում
• սառը մաշկ, գլխապտույտ կամ ուշագնացության զգացում: