H1N1 (խոզի գրիպ)․ բուժում

Գրիպով, այդ թվում՝ H1N1 գրիպով հիվանդ մարդկանց մեծ մասի համար բավարար է միայն գանգատների մեղմացումը:

Օժանդակող միջոցները, ինչպիսիք են հեղուկների ընդունումը, բարձր ջերմության և գլխացավի դեմ ցավազրկողները և հանգիստը կարող են օգտակար լինել: Եթե ունեք քրոնիկ շնչառական հիվանդություն, բժիշկը կարող է նշանակել լրացուցիչ դեղամիջոցներ, որոնք կօգնեն ձեր ախտանիշների մեղմացմանը:

Հակավիրուսային դեղերը երբեմն նշանակվում են գանգատների զարգանալու առաջին 1-2 օրերին: Դրանք կարող են մեղմացնել գանգատները և, հավանաբար, բարդությունների ռիսկը: Ամերիկյան FDA-ի կողմից հաստատված հակավիրուսային դեղամիջոցները հետևյալ 4–ն են՝

• Օսելտամիվիր (Տամիֆլու)
• Զանամիվիր (Ռելենզա)
• Պերամիվիր (Ռապիվաբ)
• Բալօքսավիր (Քսոֆուզա):

Այնուամենայնիվ, գրիպի վիրուսները կարող են այս դեղերի նկատմամբ դառնալ կայուն: Ուստի, բժիշկներն այս դեղերը «թողնում են» միայն բարդությունների բարձր ռիսկով և նման մարդկանց հետ շփվող պացիենտների համար, օրինակ՝

• հիվանդանոցում, խնամքի կենտրոնում կամ այլ փակ հաստատություններում գտնվող կամ ապրող անձինք
• 5 տարեկանից փոքր, հատկապես մինչև 2 տարեկան երեխաներ
• 65 և ավելի բարձր տարիքի մեծահասակներ
• հղիներ կամ մոտակա 2 շաբաթվա ընթացքում ծննդաբերող, ներառյալ՝ նախկինում հղիության բարդություններով կանայք
• 19 տարեկանից ցածր և երկարատև ասպիրինային բուժում ստացողներ (որը բարձրացնում է Ռեյնոյի համախտանիշի ռիսկը)
• 40–ից բարձր ՄԶԳ–ով անձինք (ախտաբանական գիրություն)
• քրոնիկ հիվանդություններով անձինք, այդ թվում՝ ասթմա, էմֆիզեմա, սրտային հիվանդություն, դիաբետ, նեյրոմկանային հիվանդություն կամ երիկամային, լյարդային և արյան հիվանդություն
• որոշ դեղամիջոցների կամ ՄԻԱՎ–ի պատճառով թուլացած իմունային համակարգով անձինք: