Գրադարան

Փայտացում. բուժում

Փայտացում. բուժում

Time Read 1 րոպե

Տետանուսային վարակը պահանջում է անհետաձգելի և երկարաժամկետ օժանդակող բուժօգնություն՝ մինչ հիվանդությունն ընթանում է իր ընթացքով, հաճախ՝ վերակենդանացման բաժանմունքում:

Ցանկացած վերք բուժվում և խնամվում է, և բժշկական անձնակազմը համոզվում է, որ հիվանդի շնչելու ունակությունը պաշտպանված է: Սովորաբար տրվում են դեղամիջոցներ, որոնք թեթևացնում են ախտանիշները, ոչնչացնում են բակտերիաները, չեզոքացնում են բակտերիաների կողմից արտադրվող թույնը (տոքսինը) և խթանում են իմունային համակարգի արձագանքը:

Հիվանդությունը զարգանում է մոտ երկու շաբաթ, իսկ վերականգնումը կարող է տևել մոտ մեկ ամիս։

Վերքի խնամք

Ձեր վերքի խնամքը պահանջում է մաքրում և վիրաբուժական մշակում, որ հեռացվեն կեղտը կամ օտար մարմիններն ու մասնիկները, որոնք կարող են իրենց մեջ բակտերիաներ պահել: Ձեր բուժող թիմը նաև կհեռացնի վերքային մեռուկացած հյուսվածքները, որոնք կարող են բարենպաստ միջավայր ստեղծել տետանուսի բակտերիաների աճի համար:

Դեղորայքային բուժում

  • Հակաթունային (անտիտոքսինային) բուժումն օգտագործվում է թույների (տոքսինների) վնասազերծման համար, որոնք դեռ չեն հասցրել վնասել նյարդային հյուսվածքները: Այս բուժումը, որը կոչվում է պասիվ իմունիզացիա, իրենից ներկայացնում է թույնի նկատմամբ մարդու հակամարմինների (իմունոգլոբուլինների) ներարկում:
  • Հանգստացնող (սեդատիվ) միջոցները, որոնք դանդաղեցնում են նյարդային համակարգի գործառույթը, կարող են օգնել մկանային կծկանքների (սպազմերի) վերահսկմանը:
  • Տետանուսի դեմ ստանդարտ պատվաստումներից մեկնումեկի միջմկանային ներարկումը կարող է խթանել իմունային համակարգին, որ վերջինս միանա թույների (տոքսինների) դեմ պայքարին:
  • Հակաբիոտիկները, որոնք կարող են տրվել բերանային (օրալ) կամ ներարկային, կարող են օգնել տետանուսի բակտերիաների դեմ պայքարին:
  • Այլ դեղամիջոցներ. ակամա մկանային ակտիվությունը կարգավորելու համար, ինչպիսիք են սրտի կծկումները և շնչառական շարժումները, կարող են նշանակվել այլ խմբերի դեղամիջոցներ: Օրինակ, Մորֆինը կարող է օգտագործվել ինչպես այս նպատակով, այնպես էլ որպես հանգստացնող (սեդատիվ) միջոց:

Օժանդակող բուժում և խնամք

Օժանդակող թերապիաները ներառում են բուժումներ՝ համոզվելու, որ ձեր շնչուղիները մաքուր են, ինչպես նաև օժանդակող շնչառություն կամ թթվածին տրամադրելու համար: Ստամոքսի մեջ տեղադրված խողովակը (նազոգաստրալ զոնդ) օգնում է համարժեք սնուցման ապահովմանը: Խնամքի միջավայրը նախատեսված է նվազեցնելու ձայները, լույսը կամ գեներալիզացված սպազմերի այլ հնարավոր հրահրիչները:

Հոդվածը տեղադրվել է՝ 25-01-2024 վերանայվել է՝ 25-01-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով