Թալասեմիա

3 րոպե

Թալասեմիան գենետիկ հիվանդությունների խումբ է, որն ընթանում է արյան ախտահարմամբ, մասնավորապես՝ ախտաբանական կառուցվածքով հեմոգլոբինի արտադրությամբ:

Թալասեմիայով մարդկանց օրգանիզմում չի արտադրվում բավարար քանակով առողջ հեմոգլոբին: Վերջինս սպիտակուցային նյութ է, որի միջոցով արյան կարմիր բջիջները (էրիթրոցիտները) տեղափոխում են թթվածինը: Ուստի, թալասեմիան մարդկանց դարձնում է անեմիկ:

Ի՞նչ է թալասեմիան

Թալասեմիան ժառանգական հիվանդություն է, որի ժամանակ արյան կարմիր բջիջների (էրիթրոցիտների) հեմոգլոբինի մի մասը նորմալ չէ (ալֆա կամ բետա գլոբինային շղթաների կառուցվածքի խանգարում): Բժիշկները նման խանգարումն անվանում են հեմոգլոբինոպաթիաներ:

Հեմոգլոբինն արյան կարմիր բջիջների գլխավոր սպիտակուցն է, որն ապահովում է արյան միջոցով թթվածնի տեղափոխումը թոքերից դեպի մյուս բոլոր հյուսվածքներ և օրգան-համակարգեր: Հեմոգլոբինոպաթիայի դեպքում խախտվում է թթվածնի տեղափոխման այս գործընթացը, որի արդյունքում զարգանում է սակավարյունություն (անեմիա):

Թալասեմիան կարող է լինել թեթև (երբեմն կոչվում է փոքր թալասեմիա) և ծանր: Ծանր խնդիրներ առաջացնող թալասեմիան գենետիկական դեֆեկտից կախված կոչվում է նաև մեծ թալասեմիա, Քուլեի անեմիա կամ միջերկրածովյան անեմիա:

Թալասեմիան ավելի տարածված է Հարավային և Կենտրոնական Ասիայի, Միջերկրածովյան տարածաշրջանի, Փոքր ասիայի, Հնդկաստանի և Հյուսիսային Աֆրիկայի ծագմամբ մարդկանց շրջանում: Կանանց և տղամարդկանց մոտ հիվանդությունը հանդիպում է հավասար հաճախականությամբ:

Թալասեմիայի ախտանիշները

Թալասեմիայով անձինք կարող են՝

• զգալ հոգնածություն, թուլություն և շնչարգելություն
• աճել ավելի դանդաղորեն, քան սովորական երեխաները (նաև՝ սեռահասունացման հապաղում)
• լինել գունատված կամ դեղնավուն երանգավորված մաշկով (դեղնուկ)
• ունենալ մուգ մեզ
• ունենալ այտուցված որովայն
• ունենալ դեմքի ոսկրերի քիչ ձևախախտում (ոսկրածուծի ավելի մեծ ծավալ զբաղեցնելու և ոսկրի լայանացման պատճառով)
• ունենալ մեծացած փայծաղ (սպլենոմեգալիա)
• լինել վարակների նկատմամբ ավելի խոցելի, հատկապես՝ փայծաղը հեռացնելուց հետո:

Ծանր ընթացքի դեպքում այս ախտանիշները կարող են ի հայտ գալ դեռևս նորածնային և մանկահասակ տարիքում:

Թալասեմիայի ախտորոշումը

Որոշ մարդկանց մոտ թալասեմիան կարող է հայտնաբերվել, երբ նրանք ինքնազգացողության գանգատներով դիմում են բժշկական օգնության: Նման դեպքերում արյան և գենետիկական թեստերը կարող են հաստատել ախտորոշումը:

Այլ մարդկանց մոտ թալասեմիան կարող է հայտնաբերվել պատահականորեն, երբ այլ պատճառով նրանք հետազոտում են իրենց արյունը:

Կան նաև որոշ իրավիճակներ, երբ բժիշկը կարող է կասկածել թալասեմիա և խորհուրդ տալ արյան թեստ: Մասնավորապես, ձեզ կարող են առաջարկել արյան անալիզ, եթե՝

• դուք պատրաստվում եք երեխա ունենալ
• դուք ունեք թալասեմիայով հիվանդ արյունակից հարազատ
• դուք կամ ձեր հարազատներն ունեն անբացատրելի սակավարյունություն (արյան ցածր երկաթ)
• ձեր ծնողները ծնունդով այն տարածաշրջաններից են, որտեղ թալասեմիան տարածված է:

Չծնված երեխաները նույնպես կարող են թալասեմիայի նկատմամբ հետազոտվել:

Թալասեմիայի բուժումը

Եթե ունեք թալասեմիա, կարող եք բուժման կարիք ունենալ կամ չունենալ: Ամեն ինչ կախված է ձեր ախտանիշների ծանրության աստիճանից:

Ծանր թալասեմիայով անձինք կարող են ունենալ յուրաքանչյուր 3-4 շաբաթը մեկ կրկնվող արյան փոխներարկման կարիք: Ավելի մեղմ ընթացքով մարդկանց արյան փոխներարկում կարող է ընդհանրապես չառաջարկվել կամ հազվադեպ առաջանա նման անհրաժեշտություն:

Արյան փոխներարկումները կարող են բերել օրգանիզմում երկաթի կուտակման և վերջինիս թունավոր ազդեցությունների դրսևորման, որից ավելի հաճախ տուժում են սիրտը և լյարդը: Նման դեպքերում կարող է առաջարկվել արյան երկաթի մակարդակը նվազեցնող դեղեր:

Ավելի հազվադեպ, ծանր թալասեմիայի դեպքում կարող է առաջարկվել ցողունային բջիջների կամ ոսկրածուծի փոխպատվաստման վիրահատական միջամտություն:

Եթե կրում եք թալասեմիայի գեն և մտադիր եք երեխա ունենալ, կարող եք անցնել գենետիկ թեստ: Ձեր երեխայի մոտ առկա է թալասեմիայի 25%-ոց ռիսկ, եթե ինչպես դուք, այնպես էլ ձեր զուգընկերն ունեք թալասեմիայի գեն (գենի փոխադրող կամ կրող եք):