Գանգուղեղային վնասվածք. ախտորոշում

Գանգուղեղային վնասվածք. ախտորոշում

Գանգուղեղային տրավման կարող է ստեղծել անհետաձգելի բուժօգնության անհրաժեշտություն, իսկ ծանր տրավմաների ժամանակ բուժման հետաձգումը կամ բացակայությունը կարող է էլ ավելի վատթարացնել տուժողի վիճակը:

Նման իրավիճակներում անհապաղ սկսված բուժումը\ հաճախ զուգակցվում է գլխուղեղի վնասման բնույթը, ծանրության աստիճանը և բարդություններն ախտորոշելու անհետաձգելի միջոցառումների հետ:

Գլազգոյի կոմայի սանդղակ

15-բալանի թեստն օգնում է բժշկին կամ անհետաձգելի բուժօգնություն ցուցաբերող բուժանձնակազմին, որպեսզի նախական գնահատեն գլխուղեղի վնասվածքի ծանրության աստիճանը: Գլազգոյի կոմայի սանդղակը հիմնված է տուժողի կողմից ըստ հրահանգի աչքերը և վերջույթները շարժելու ունակության վրա: Խոսքի կապակցվածության աստիճանը նույնպես կարևոր տեղեկություն է տրամադրում: Ըստ այս սանդղակի պացիենտները ստանում են 3-ից մինչև 15 միավոր (բալ): Որքան միավորները բարձր են, այդքան վնասվածքն ավելի քիչ ծանր է:

Վնասվածքի և ախտանիշների վերաբերյալ տեղեկատվություն

Եթե որևէ մեկը գանգուղեղային տրավմա է ստացել ձեր ներկայությամբ, ապա դուք կարող եք ժամանած բուժանձնակազմին տրամադրել օգտակար տեղեկատվություն: Մասնավորապես, այս հարցերի պատասխանները կարող են բժշկին օգնել տրավմայի ծանրության աստիճանը գնահատելիս՝

  • ինչպե՞ս և ի՞նչ հանգամանքներում է տրավման առաջացել
  • կորցրե՞լ է արդյոք տուժողն իր գիտակցությունը
  • եթե այո, ապա որքա՞ն է տևել նրա անգիտակից վիճակը
  • նկատե՞լ եք արդյոք տրավմայի հետևանքով այլ նշաններ՝ կապված շնչառության խանգարման, հավասարակշռության խախտման, ցնցումների առաջացման և այլնի հետ
  • գլխի կամ մարմնի այլ մասերի կոնկրետ ո՞ր շրջաններն են հարված ստացել
  • ի՞նչ ուժգնության հարվածի կամ տրավմատիկ ազդեցության մասին է խոսքը:

Պատկերման հետազոտություններ

  • Համակարգչային տոմոգրաֆիա (ԿՏ). գլխուղեղի վնասվածքի կասկածի դեպքում ԿՏ-ն սովորաբար առաջին անգամ անցկացվում է անհետաձգելի միջոցառումների հետ միասին՝ հիվանդանոցում: ԿՏ-ն օգտագործում է ռենտգեն պատկերումների մի շարք («շերտեր»), որի շնորհիվ ստացվում է գլխուղեղի մանրակրկիտ պատկերը: ԿՏ-ն կարող է ժամանակի փոքր միջակայքի սահմաններում տեսանելի դարձնել գանգի կոտրվածքները, գլխուղեղի վնասման չափն ու բնույթը, հայտնաբերել հնարավոր ներգանգային արյունահոսությունները (հեմոռագիա), արյան մակարդուկները (հեմատոմա), ուղեղանյութի պատռվածքները (սալջարդ կամ «կոնտուզիա») կամ այտուցը:
  • Մագնիսա-ռեզոնանսային տոմոգրաֆիա (ՄՌՏ). ՄՌՏ-ն օգտագործում է հզոր մագնիսական և ռադիո ալիքներ, որպեսզի պատկերի գլխուղեղի մանրակրկիտ կառուցվածը: Հետազտությունը կարող է օգտագործվել տուժողի վիճակը կայունանալուց և ախտանիշների բարելավումից հետո:

Ներգանգային ճնշման հսկողություն

Գլխուղեղի վնասվածքից հետո ուղեղանյութի այտուցը կարող է բարձրացնել ներգանգային ճնշումը և առաջացնել ուղեղի հավելյալ վնասում: Բժիշկները կարող են գանգի պատի միջով ներմուծել հատուկ զոնդ, որով չափեն և վերահսկեն ներգանգային ճնշումը:

Հոդվածը վերանայվել է՝ 27-04-2021