1-ին տիպի դիաբետ

Դիաբետը հիվանդություն է, որի ժամանակ օրգանիզմը չի կարողանում արյան գլյուկոզը պահել նորմալ մակարդակի վրա։

Ծանոթացեք նաև այս հոդվածի հետ ուղղակիորեն կապված այլ նյութերի հետ:

Եթե 2-րդ տիպի դիաբետի դեպքում նվազում է ենթաստամոքսային գեղձի կողմից ինսուլինի արտադրությունը կամ օրգանիզմը չի յուրացնում այն, ապա 1-ին տիպի դիաբետի ժամանակ ինսուլին ընդհանրապես չի արտադրվում կամ արտադրվում է խիստ անհամարժեք քանակով: Արդյունքում բջիջները չեն կարողանում յուրացնել արյան շաքարը, որը կուտակվում է արյան մեջ՝ առաջացնելով արյան գլյուկոզի մակարդակի բարձրացում (հիպերգլիկեմիա): Հիպերգլիկեմիան և բջիջների մշտական «քաղցը» առաջացնում է հիվանդության ախտանիշները (մշտական ծարավի և քաղցի զգացողություն, հաճախամիզություն, անսովոր ընդհանուր թուլություն, քաշի կորուստ և այլն) և զարգացնում տարբեր բարդություններ և այլ առողջական խնդիրներ։

1-ին տիպի դիաբետի ռիսկը կարող է փոխանցվել սերնդից սերունդ։ Եթե ձեր ծնողներից մեկնումեկը, եղբայրը կամ քույրը ունեն 1-ին տիպի դիաբետ, հիվանդության զարգացման ռիսկը ձեզ մոտ բարձրանում է։

1-ին տիպի դիաբետն առաջանում է, երբ իմունային համակարգը «գրոհում» և վնասում է ենթաստամոքսային գեղձի ինսուլին արտադրող բջիջները։ Թեև դիաբետի այս տեսակը վերջնական բուժում չունի, այն կարելի է վերահսկելի դարձնել՝ ստանալով ինսուլինի համարժեք դեղաչափեր և առողջացնելով ապրելակերպը։

Եթե բժիշկը կարծում է, որ ունեք դիաբետ, նշանակում է որոշ հետազոտություններ, այդ թվում գլյուկոզի մակարդակն արյան մեջ (և մեզում) և գլիկոզիլացված հեմոգլոբին (որը պատկերացում է տալիս հետազոտությանը նախորդող 3 ամսվա ընթացքում արյան գլյուկոզի միջին մակարդակի մասին)։

1-ին տիպի դիաբետի ժամանակ բժիշկը նշանակում է ինսուլինային փոխարինող բուժում։ Ձեզ ինսուլինը կարող է նշանակվել ենթամաշկային կամ ներմուծման այլ ուղիներով։ Առողջ ապրելակերպը կարող է զգալիորեն բարձրացնել ինսուլինով բուժման արդյունավետությունը։

1-ին տիպի դիաբետը հնարավոր չէ կանխարգելել (անգամ առողջ ապրելակերպի միջոցով)։

Ինչպե՞ս ապրել 1-ին տիպի դիաբետով

Ինսուլին ստանալուց բացի, դուք կարող եք հաջողությամբ կարգավորել ձեր արյան գլյուկոզի մակարդակը և կանխել կամ հետաձգել բարդությունների առաջացումը հետևյալ պարզ քայլերով՝

  • սովորեք, թե ինչպես հսկել ձեր արյան գլյուկոզի մակարդակը
  • հետևեք առողջ սննդակարգին և եղեք ֆիզիկապես ակտիվ
  • պարբերաբար այցելեք ձեր բժշկին և անցեք կանոնավոր ստուգումներ
  • խնամեք ձեր ոտքերը և մշտապես ստուգեք դրանց արտաքին տեսքը
  • պարբերաբար այցելեք ակնաբույժին և կանոնավոր կերպով ստուգեք ձեր տեսողությունը
  • ընդունեք դեղերն այնպես, ինչպես նշանակել է բժիշկը։

Հոդվածը վերանայվել է՝ 09-04-2021