Պատճառներ - 2-րդ տիպի դիաբետ

2-րդ տիպի դիաբետը հանդիսանում է շաքարի (գլյուկոզ) փոխանակության խանգարում:

2-րդ տիպի դիաբետը հիմնականում երկու փոխկապակցված խնդիրների արդյունք է:

• Մկանների, ճարպի և լյարդի բջիջները դառնում են ինսուլինի նկատմամբ կայուն (ռեզիստենտ): Այս բջիջները նորմալ ձևով չեն փոխազդում ինսուլինի հետ, ուստի չեն վերցնում բավարար քանակով շաքար:
• Ենթաստամոքսային գեղձը (պանկրեաս) չի կարողանում արտադրել բավարար քանակով ինսուլին, որ կարգավորի արյան շաքարի մակարդակները:

Թե ինչու է սա տեղի ունենում, անհայտ է, սակայն ավելորդ քաշը և ֆիզիկական թերակտիվությունն առանցքային նպաստող գործոններ են:

Ինչպես է ինսուլինն ազդում

Ինսուլինը հորմոն է, որն արտադրվում է ստամոքսից ետ և ներքև ընկած գեղձում (պանկրեաս): Ինսուլինը կարգավորում է այն, թե ինչպես է օրգանիզմը յուրացնում շաքարը հետևյալ ճանապարհներով՝

• արյան շաքարը դրդում է ենթաստամոքսային գեղձին, որ արտադրի ինսուլին (սեկրեցիա)
• ինսուլինը շրջանառում է արյունով՝ թույլ տալով, որ շաքարը թափանցի ձեր բջիջներ
• արյան շաքարի քանակը պակասում է
• ի պատասխան այս անկման, ենթաստամոքսային գեղձը արյան հուն է բաց թողնում ավելի քիչ ինսուլին:

Գլյուկոզի դերը

Գլյուկոզը շաքար է, որը հանդիսանում է էներգիայի գլխավոր աղբյուրը մկանների և մյուս բոլոր հյուսվածքների բջջների համար: Գլյուկոզի յուրացումը և կարգավորումը ներառում է հետևյալը՝

• ձեր օրգանիզմը գլյուկոզ ստանում է երկու հիմնական աղբյուրից՝ սնունդ և լյարդ
• սննդով ստացված գլյուկոզը ներծծվում է արյան հուն, որտեղից ինսուլինի օգնությամբ ներթափանցում բջիջներ
• ձեր լյարդը պահեստավորում է գլյուկոզը գլիկոգենի տեսքով
• երբ ձեր գլյուկոզի մակարդակները ցածր են, օրինակ, երբ դուք երկար ժամանակ սնունդ չեք ստացել, լյարդը տրոհում է պահեստավորված գլիկոգենը և ստանում գլյուկոզ, որ պահպանի ձեր գլյուկոզի մակարդակը նորմալ միջակայքում:

2-րդ տիպի դիաբետի ժամանակ այս գործընթացը խախտված է: Բջիջներ ներթափանցելու փոխարեն շաքարը սկսում է կուտակվել արյան մեջ: Երբ արյան շաքարի մակարդակն աճում է, ենթաստամոքսային գեղձի ինսուլին արտադրող բետա բջիջները սկսում են արյան հուն բաց թողնել ավելի շատ ինսուլին: Ի վերջո, այս բջիջները վնասվում են և չեն հասցնում արտադրել բավարար քանակով ինսուլին, որ ապահովեն օրգանիզմի պահանջարկը:

Ավելի քիչ հանդիպող 1-ին տիպի դիաբետի ժամանակ իմունային համակարգը սխալմամբ «գրոհում» և վնասում է բետա բջիջները՝ բերելով ինսուլինի կտրուկ քչացման կամ բացակայության:

Ռիսկի գործոններ

2-րդ տիպի դիաբետի ռիսկը բարձրացնող գործոնները բազմաթիվ են:

• Մարմնի քաշ. ավելորդ քաշը կամ գիրությունը 2-րդ տիպի դիաբետի գլխավոր ռիսկի գործոնն են:
• Ճարպի տեղաբաշխում. ճարպի կուտակումը գլխավորապես որովայնում, այլ ոչ թե կոնք-ազդրային շրջանում վկայում է ավելի բարձր ռիսկի մասին: 2-րդ տիպի դիաբետի ռիսկը բարձրանում է, եթե իրանի շրջանագիծը տղամարդկանց մոտ 40 դյույմից (101,6 սմ) կամ կանանց մոտ 35 դյույմից (88,9 սմ) մեծ է:
• Թերակտիվություն. որքան պակաս ակտիվ եք, այդքան ձեր ռիսկը բարձր է: Ֆիզիկական ակտիվությունն օգնում է քաշի վերահսկմանը, ծախսում է գլյուկոզը՝ որպես էներգիա և ձեր բջիջները ինսուլինի նկատմամբ դարձնում է ավելի զգայուն:
• Ընտանեկան պատմություն. 2-րդ տիպի դիաբետի ռիսկը բարձրանում է, եթե ձեր ծնողները կամ քույր-եղբայրներն ունեն 2-րդ տիպի դիաբետ:
• Ռասա և էթնիկ ծագում. դեռևս անհայտ պատճառով որոշ ռասաների կամ էթնիկ խմբերի շրջանում, ներառյալ՝ սևամորթներ, լատինոամերիկացինեը, բնիկ ամերիկյան և ասիական ժողովուրդներ, 2-րդ տիպի դիաբետի զարգացման հավանականությունն ավելի բարձր է, քան սպիտակամորթների մոտ:
• Արյան լիպիդների (ճարպերի) մակարդակներ. բարձրացած ռիսկը կապված է բարձր խտության լիպոպրոտեիդների (ԲԽԼ) կամ «լավ» խոլեստերինի ցածր և տրիգլիցերիդների բարձր մակարդակների հետ:
• Տարիք. 2-րդ տիպի դիաբետի ռիսկը տարիքին զուգընթաց բարձրանում է, հատկապես՝ 35-ից հետո:
• Նախադիաբետ (պրեդիաբետ). նախադիաբետը մի վիճակ է, երբ արյան շաքարի մակարդակը նորմայից բարձր է, բայց ոչ այնքան բարձր, որ դասակարգվի որպես դիաբետ: Բուժումից դուրս թողելու դեպքում նախադիաբետը հաճախ վերաճում է 2-րդ տիպի դիաբետի:
• Հղիության հետ կապված ռիսկեր. ձեզ մոտ 2-րդ տիպի դիաբետի զարգացման ռիսկը բարձրանում է, եթե եղել եք հղի կամ ծննդաբերել եք 4 կգ-ից ավելի խոշոր երեխա:
• Պոլիկիստոզային ձվարանների համախտանիշ (ՊՁՀ). սա տարածված հիվանդություն է, որը բնորոշվում է անկանոն դաշտանային ցիկլերով, մազակալմամբ և գիրությամբ: ՊՁՀ-ն բարձրացնում է դիաբետի ռիսկը:
• Մաշկի մգացած շրջաններ, սովորաբար՝ թևատակերում և պարանոցին. այս վիճակը հաճախ վկայում է ինսուլինակայունության մասին: