Բարդություններ - 2-րդ տիպի դիաբետ

2-րդ տիպի դիաբետը բացասաբար է ազդում բազմաթիվ հիմնական օրգանների վրա՝ սիրտ, արյունատար անոթներ, նյարդեր, աչքեր և երիկամներ:

Միևնույն ժամանակ, դիաբետի ռիսկը բարձրացնող գործոնները ռիսկի գործոններ են հանդիսանում նաև այլ լուրջ քրոնիկ հիվանդությունների համար: Դիաբետի կառավարումը և ձեր արյան շաքարի հսկումը կարող են նվազեցնել այս բարդությունների կամ ուղեկցող (կոմորբիտ) հիվանդությունների զարգացման ռիսկը:

Դիիաբետի հնարավոր բարդությունները և հաճախ հանդիպող ուղեկցող հիվանդություններն ամփոփ ներկայացված են ստորև:

• Սրտային և արյունատար անոթային հիվանդություն. դիաբետը կապված է սրտային հիվանդության, ինսուլտի, բարձր արյան ճնշման (հիպերտենզիա) և արյունատար անոթների նեղացման (աթերոսկլերոզ) բարձրացած ռիսկի հետ:
• Վերջույթների նյարդերի վնասում (նեյրոպաթիա). ժամանակի ընթացքում բարձր արյան գլյուկոզը կարող է վնասել կամ անգործունակ դարձնել նյարդերը՝ առաջացնելով ծակծկոցներ, թմրածություն, այրոց, ցավ կամ ի վերջո՝ զգացողության կորուստ, որը սովորաբար սկսվում է ոտքերի կամ ձեռքերի մատների ծայրերից և աստիճանաբար տարածվում վերև:
• Այլ նյարդերի վնասում. սրտի նյարդերի վնասումը կարող է նպաստել անկանոն սրտի ռիթմի առաջացմանը: Մարսողական համակարգի նյարդերի վնասումը կարող է առաջացնել սրտխառնոց, փսխում, լուծ կամ փորկապություն: Տղամարդկանց մոտ նյարդերի վնասումը կարող է զարգացնել էրեկտիլ դիսֆունկցիա:
• Երիկամային հիվանդություն. դիաբետը կարող է բերել քրոնիկ երիկամային հիվանդության կամ անդառնալի վերջնափուլային երիկամային հիվանդության, որը կարող է պահանջել դիալիզ կամ երիկամի փոխպատվաստում:
• Աչքերի վնասում. դիաբետը բարձրացնում է աչքի լուրջ հիվանդությունների ռիսկը, ինչպիսիք են՝ կատարակտ և գլաուկոմա, և կարող է վնասել ցանցաթաղանթի արյունատար անոթները՝ բերելով տեսողության կորստի կամ կուրության:
• Մաշկային հիվանդություններ. դիաբետը կարող է ձեզ դարձնել ավելի «խոցելի» մաշկային խնդիրների նկատմամբ, ներառյալ՝ բակտերիալ և սնկային վարակներ:
• Դանդաղ ապաքինում. չբուժվելու դեպքում կտրված կամ քերծված վերքերը կարող են բարդանալ ծանր վարակներով, որոնք ուշ են լավանում, դժվարությամբ են բուժում կամ երբեմն դառնում անբուժելի: Ծանր վնասումը կարող է պահանջել ոտքի մատների, ոտնաթաթի կամ ամբողջական ոտքի անդամահատում (ամպուտացիա):
• Լսողության խանգարում. լսողության խնդիրները ավելի տարածված են դիաբետով մարդկանց շրջանում:
• Քնի ապնոէ. օբստրուկտիվ քնի ապնոէն տարածված է 2-րդ տիպի դիաբետով ապրող մարդկանց շրջանում: Այս երկու հիվանդությունների համար գիրությունը կարող է հանդես գալ որպես գլխավոր նպաստող գործոն: Դեռևս պարզ չէ, թե արդյոք քնի ապնոէի բուժումը կարող է բարելավել արյան շաքարի մակարդակի հսկումը:
• Դեմենցիա. 2-րդ տիպի դիաբետը հավանաբար բարձրացնում է Ալցհեյմերի հիվանդության և այլ խանգարումների ռիսկը, որոնք բերում են թուլամտության (դեմենցիա): Արյան շաքարի մակարդակի վատ վերահսկումը կապված է հիշողության և այլ մտավոր հմտությունների ավելի արագ թուլացման հետ: