Ասթմա․ բարդություններ

Վատ վերահսկվող ասթման կարող է ընթանալ տարբեր բարդություններով, որոնք ժամանակի ընթացքում ավելի ու ավելի մեծ բացասական ազդեցություն են թողնում ձեր կյանքի որակի վրա։

Ասթմայի բարդություններից են՝

  • այնպիսի գանգատներ կամ ախտանիշներ, որոնք խաթարում են քունը և հոգնածության պատճառով նվազեցնում աշխատանքային արդյունավետությունը կամ այլ գործեր անելը (օրինակ՝ ֆիզիկական ակտիվության կամ վարժանքների կատարման անհնարինություն, որն իր հերթին կարող է զարգացնել առողջական այլ խնդիրներ, օրինակ՝ բարձր արյան ճնում կամ քաշի ավելացում)
  • ասթմայի սրացման կամ բուժման հետ կապված դասերից կամ աշխատանքից հաճախակի բացակայություններ, ինչպես նաև ուսման հետ կապված խնդիրներ
  • թոքերի օդատար խողովակների կայուն նեղացում, որն ազդում է շնչառության որակի վրա
  • ասթմայի նոպաների պատճառով այցեր բուժկենտրոն կամ անհետաձգելի բուժօգնության բաժանմունքներ
  • ասթմայի որոշ դեղերի երկարատև օգտագործմամբ պայմանավորված կողմնակի ազդեցություններ
  • հոգեբանական խնդիրներ, այդ թվում՝ սթրես, անհանգստություն և տագնապ կամ դեպրեսիա։

Այնուամենայնիվ, պատշաճ բուժումը կարող է զգալի կերպով կանխարգելել ասթմայի պատճառած ինչպես կարճատև, այնպես էլ երկարատև բարդությունները:

Եթե դուք զգում եք, որ ասթման լրջորեն ազդում է ձեր կյանքի որակի վրա, կապ հաստատեք ձեր բժշկի հետ։ Նման դեպքերում կարիք կառաջանա վերանայել ձեր հիվանդության վարման պլանը, որ բարելավվի ասթմայի հսկողությունը։ Բժիշկը կարող է փոփոխել դեղերը, դրանց դեղաչափերը, ավելացնի բուժական նոր միջոցներ և այլն։

Հազվադեպ, ասթման կարող է բերել մի շարք լուրջ կամ ծանր շնչական բարդությունների, օրինակ՝

  • թոքաբորբ (թոքերի վարակային բորբոքում)
  • թոքի լրիվ կամ մասնակի կոլապս
  • շնչական անբավարարություն, երբ արյան մեջ թթվածնի մակարդակը իջնում է վտանգավոր ցածր մակարդակի կամ ածխաթթու գազի մակարդակը դառնում է վտանգավոր բարձր
  • ասթմատիկ վիճակ (լատիներեն՝ status asthmaticus), որը բուժմանը չենթարկվող ասթմատիկ սուր նոպա է կամ դրա անընդմեջ կրկնությունը։

Բոլոր այս բարդությունները կարող են դառնալ կյանքին սպառնացող և պահանջում են անհետաձգելի բուժօգնություն, սովորաբար՝ հիվանդանոցային պայմաններում։

Հոդվածը վերանայվել է՝ 15-04-2021