Ասթմա. բուժում

Ասթմա. բուժում

Ասթմայի բուժումը ներառում է մի շարք կանխարգելիչ և բուժական մոտեցումներ:

Ասթմայի (բրոնխիալ ասթմա) բուժման նպատակը հետևյալ երկու կարևոր խնդիրները լուծելն է՝

  • հիվանդության գանգատների և նշանների՝ ախտանիշների մեղմացում
  • ապագա ախտանիշների և ասթմայի նոպաների զարգացման երկարաժամկետ կանխարգելում:

Բուժումը սովորաբար ներառում է ասթմայի նոպայի դրսևորմանը նպաստող գործոնների հայտնաբերումը (տրիգերներ), դրանցից խուսափելու քայլերը և դեղամիջոցների օգնությամբ ախտանիշները հսկողության տակ պահելը: Ասթմայի սրացման և նոպայի զարգացման դեպքում առաջանում է արագ ազդող ինհալանտի օգտագործման կարիք:

Դեղամիջոցներ

Բժիշկն ընտրում է ձեր դեղը՝ հաշվի առնելով բազմաթիվ գործոններ՝ տարիք, ախտանիշներ, ասթմայի տրիգերներ և արդյունավետ կերպով ախտանիշների կանխարգելման ունակություն:

Կանխարգելիչ, երկարատև հսկողության դեղամիջոցները մեղմացնում են ձեր թոքերի օդատար խողովակների՝ բրոնխների այտուցվածությունը (բորբոքում)՝ դրանով իսկ կանխելով ախտանիշների դրսևորմանը: Արագ ազդող ինհալանտները (բրոնխալայնիչներ կամ բրոնխոդիլատատորներ) արագորեն «բացում են» այտուցված և նեղացած բրոնխները՝ մեղմացնելով ախտանիշները: Որոշ դեպքերում բժիշկը կարող է նշանակել նաև հակաալերգիկ դեղամիջոցներ:

Երկարաժամկետ ազդեցության դեղամիջոցներն ընդհանուր առմամբ պետք է ընդունել ամեն օր: Այս դեղերը ասթման պահում են վերահսկման ներքո և կրճատում են ասթմայի նոր նոպայի հավանականությունը: Այս դեղերից են՝

  • ինհալացիոն կորտիկոստերոիդներ
  • լեյկոտրիենի ձևափոխիչներ
  • համակցված ինհալյատորներ
  • Թեոֆիլին:

Արագ ազդող (կարճաժամկետ ազդեցության) դեղամիջոցներն օգտագործվում են ասթմայի նոպայի ժամանակ զարգացած ախտանիշների արագ և կարճատև մեղմացման համար: Բժշկի խորհրդով դրանք նաև կարող են օգտագործվել ֆիզիկական ակտիվությունից առաջ: Այս դեղերից են՝

Հակաալեգիկ դեղերն օգնում են, եթե ասթման զարգանում կամ սրվում է ալերգիկ ռեակցիայի պատճառով: Դրանցից են՝

  • իմունաբուժման դեղեր
  • կենսաբանական դեղեր (բիոլոջիկներ):

Իմացե՛ք ավելին ասթմայի դեղերի մասին:

Այցելեք բժշկին կանոնավոր կերպով, որ նա գնահատի ձեր հիվանդության ընթացքը, ասթմայի դեմ նշանակված դեղանւջոցների արդյունավետությունը և անհրաժեշտության դեպքում բուժման մեջ կատարի համապատասխան փոփոխություններ (դեղերի փոխարինում, դեղաչափերի փոփոխություններ, ընդունման ձևի ու կարգի վերանայումներ և այլն):

Ասթմայի բուժման դեղերը սովորաբար արտադրվում են որպես ինհալյատորներ («փչիկներ»), որոնք թույլ են տալիս ներշնչման փուլում ձեր բերանի միջոցով ակտիվ դեղամիջոց պարունակող աերոզոլն ուղղել անմիջապես ձեր վերին շնչուղիներից ներս՝ առանց բերանի խոռոչի (լեզու, քիմք) կամ ըմպանի լորձաթաղանթի վրա «կորուստներ տալու»:

Բժիշկը ձեզ կբացատրի ինհալյատորների ճիշտ օգտագործման ձևը, որից կախված է նաև դրանց ազդեցության ուժը և արդյունավետությունը:

Հաճախ ինհալյատորներն ավելի լավ են ազդում, երբ տրվում են այսպես կոչված «տարողությունների» (սփեյսեր) միջոցով: Դրանք մեծ պլաստիկ տարաներ են, որոնց մի ծայրի կա հատուկ հարմարեցված բացվածք, որը դուք «բռնում եք» ձեր շրթունքներով և ատամներով, իսկ մյուս ծայրին ամրացվում և փչվում է ինհալյատորը: Այս դեպքում դուք շնչում եք դեղի և սփեյսերի օդի խառնուրդը:

Նման «տարողությունները» պետք է օգտագործել հետևյալ դեպքերում՝

  • 4-5 տարեկանից ցածր տարիքի երեխաները («տարողությանը» միացված հատուկ դիմակով)
  • բոլոր չափահասները, ովքեր ստանում են ինհալյատորային կորտիկոստերոիդային կանխարգելիչ դեղեր
  • չափահասներ, ովքեր դժվարանում են իրականացնել ինհալյատորներից օգտվելու «սեղմիր և շնչիր» մեթոդը
  • չափահասներ, ովքեր փորձում են բրոնխոլիտիկ դեղերն օգտագործել ասթմայի նոպայի ժամանակ:

Ասթմայի արդյունավետ բուժումը նշանակում է, որ դուք կարող եք հսկել ձեր առողջական վիճակը՝ ապրելով լիարժեք կյանքով: Ճիշտ գիտելիքներով, հմտություններով և դեղերով դուք ի վիճակի եք հասնել նման ցանկալի վիճակին: Պարզապես պետք է խստորեն հետևել ձեր բուժմանը և բժշկի բոլոր խորհուրդներին:

Հոդվածը վերանայվել է՝ 01-06-2021