Բուժում - Խոլեցիստիտ

Սուր խոլեցիստիտի բուժումը սովորաբար կազմակերպվում է հիվանդանոցային պայմաններում, որ վերահսկվի լեղապարկի բորբոքման ընթացքը:

Երբեմն առաջանում է խոլեցիստիտի վիրահատական բուժման անհրաժեշտություն:

Հիվանդանոցում բժիշկն աշխատում է վերահսկելի դարձնել հիվանդության ախտանիշները: Բուժումը կարող է ներառել հետևյալ միջոցառումները:

• Քաղց. բուժման սկզբում կարող է արգելվել որևէ սնունդ կամ հեղուկ օգտագործելը, որ բորբոքված լեղապարկին «հանգիստ տրվի»:
• Ներերակային ինֆուզիոն հեղուկներ. այս բուժումն օգնում է ջրազրկման կանխարգելմանը, ընդհանուր ինտոքսիկացիայի մեղմացմանը, իսկ որոշ դեպքերում՝ նաև թույլ է տալիս անցկացնել ներերակային (արտաաղիքային) սնուցում:
• Վարակի դեմ հակաբիոտիկներ. եթե լեղապարկը վարակված է, բժիշկը հավանաբար խորհուրդ կտա հակաբիոտիկներ: Հակաբիոտիկային բուժումը սովորաբար թիրախավորում է աղիքային միկրոֆլորայի մաս կազմող աղիքային ցուպիկը (E. coli) և բակտերոիդները։
• Ցավազրկող դեղամիջոցներ. ցավազրկողները կարող են մինչև լեղապարկի բորբոքման մեղմացումն օգնել ցավի կառավարմանը:
• Քարերի հեռացման միջամտություններ. բժիշկը կարող է կատարել էնդոսկոպիկ հետադարձ (ռետրոգրադ) խոլանգիոպանկրեատոգրաֆիա (ERCP), որ հեռացնի լեղային ծորանները կամ պարկային ծորանը խցանած քարերը:

Ախտանիշները սովորաբար սկսում են մեղմանալ 2-3 օրվա ընթացքում: Այնուամենայնիվ, լեղապարկի բորբոքումը հաճախ կրկնվում է, և լեղաքարային հիվանդությամբ մարդկանց մեծ մասն ի վերջո ունենում է լեղապարկի հեռացման վիրահատության կարիք:

Լեղապարկի հեռացման վիրահատություն

Լեղապարկի հեռացման վիրահատությունը կոչվում է խոլեցիստէկտոմիա: Սա հաճախ նվազագույն ինվազիվ միջամտություն է, որը կատարվում է որովայնի պատի վրա մի քանի փոքր կտրվածքների միջոցով (լապարոսկոպիկ խոլեցիստէկտոմիա): Հազվադեպ պահանջվում է բաց վիրահատություն, երբ որովայնի պատի վրա կատարվում է երկար կտրվածք (բաց խոլեցիստէկտոմիա):

Վիրահատության ժամկետը կախված է ձեր ախտանիշների ծանրության աստիճանից և վիրահատության ընթացքում և դրանից հետո խնդիրների ընդհանուր ռիսկից: Եթե ​​ցածր վիրաբուժական ռիսկի տակ եք, վիրահատությունը կարող է կատարվել ձեր հիվանդանոցում գտնվելու ընթացքում:

Երբ ձեր լեղապարկը հեռացվում է, լեղին ձեր լյարդից անմիջապես հոսում է բարակ աղի, այլ ոչ թե պահեստավորվում ձեր լեղապարկում: Նույնիսկ առանց ձեր լեղապարկի դուք կարող եք մարսել սնունդը:

Իմացե՛ք ավելին լեղապարկի հեռացման վիրահատությունների մասին: