Ախտորոշում - Քրոնիկ երիկամային հիվանդություն

Որպես երիկամների հիվանդության ախտորոշման առաջին քայլ՝ բժիշկը ձեզ հետ քննարկում է ձեր անձնական և ընտանեկան պատմությունը:

Ի թիվս այլ բաների, ձեր բժիշկը կարող է հարցեր տալ այն մասին, թե արդյոք ձեզ մոտ ախտորոշվել է բարձր արյան ճնշում, արդյոք դուք դեղորայք եք ընդունել, որը կարող է ազդել երիկամների գործունեության վրա, նկատել եք փոփոխություններ ձեր միզելու սովորույթի մեջ և արդյոք ունեք ընտանիքի անդամներ, ովքեր ունեն երիկամների հիվանդություն:

Այնուհետև ձեր բժիշկը կատարում է ֆիզիկական հետազոտություն (բուժզննում)՝ ստուգելով ձեր սրտի կամ արյունատար անոթների հետ կապված խնդիրների ախտանիշները և անցկացնում է նյարդաբանական հետազոտություն:

Երիկամների հիվանդության ախտորոշման համար ձեզ կարող են անհրաժեշտ լինել նաև որոշակի թեստեր և միջամտություններ՝ որոշելու, թե որքան ծանր է ձեր երիկամային հիվանդությունը (փուլը): Հետազոտությունները կարող են ներառել հետևյալը:

• Արյան թեստեր. երիկամների գործունեության թեստերը ստուգում են ձեր արյան մեջ թափոնային նյութերի մակարդակը, ինչպիսիք են կրեատինինը և միզանյութը:
• Մեզի թեստեր. ձեր մեզի նմուշի անալիզը կարող է բացահայտել շեղումներ, որոնք վկայում են քրոնիկ երիկամային անբավարարության մասին և օգնում են բացահայտել քրոնիկ երիկամների հիվանդության պատճառը:
• Պատկերային հետազոտություններ. ձեր բժիշկը կարող է օգտագործել գերձայնային հետազոտություն (սոնոգրաֆիա)՝ գնահատելու ձեր երիկամների կառուցվածքը և չափը: Որոշ դեպքերում կարող են օգտագործվել այլ պատկերային հետազոտություններ:
• Հետազոտելու համար երիկամային հյուսվածքի նմուշի հեռացում (բիոպսիա). ձեր բժիշկը կարող է խորհուրդ տալ երիկամի բիոպսիա, որը ներառում է երիկամային հյուսվածքի նմուշառում: Երիկամների բիոպսիան հաճախ կատարվում է տեղային անզգայացմամբ՝ օգտագործելով երկար, բարակ ասեղ, որը մտցվում է մաշկի միջով երիկամի մեջ: Բիոպսիայի նմուշն ուղարկվում է լաբորատորիա՝ անալիզի, որն օգնում է պարզելու, թե ինչն է առաջացնում ձեր երիկամների հետ կապված խնդիրը: