Գրադարան
Փորկապություն. ախտորոշում
2 րոպե
Ընդհանուր բուժզննումից և ուղիղաղիքային մատնային քննությունից բացի բժիշկները օգտագործում են հետևյալ հետազոտություններն ու միջամտությունները, որ ախտորոշեն քրոնիկ փորկապությունը և փորձեն գտնել պատճառը:
- Արյան թեստեր. ձեր բժիշկը կփնտրի այնպիսի համակարգային վիճակներ, ինչպիսին են վահանաձև գեղձի հորմոնների ցածր (հիպոթիրեոզ) կամ կալցիումի բարձր մակարդակները (հիպերկալցեմիա):
- Ռենտգեն հետազոտություն. ռենտգենը կարող է օգնել ձեր բժշկին որոշելու, թե արդյոք ձեր աղիքները խցանված են, և արդյոք կա կղանք հաստ աղիքի երկայնքով առկա է կղանք:
- Ուղիղ աղիքի և հաստ աղիքի ստորին հատվածի՝ սիգմայաձև աղիքի հետազոտություն (սիգմոիդոսկոպիա). այս միջոցառմամբ ձեր բժիշկը լուսավորված, ճկուն խողովակ է մտցնում ձեր հետանցքի մեջ՝ հետազոտելու ձեր ուղիղ աղիքը և հաստ աղիքի ստորին հատվածը:
- Ուղիղ աղիքի և ամբողջ հաստ աղիքի հետազոտություն (կոլոնոսկոպիա). այս ախտորոշիչ հետազոտությունը թույլ է տալիս ձեր բժշկին ճկուն, տեսախցիկով հագեցած խողովակով հետազոտել ձեր ամբողջ հաստ աղիքը:
- Հետանցքային սեղմանի մկանային գործունեության գնահատում (անոռեկտալ մանոմետրիա). այս հետազոտության ժամանակ ձեր բժիշկը նեղ, ճկուն խողովակ է մտցնում ձեր հետանցքի և ուղիղ աղիքի մեջ, այնուհետև փչում է խողովակի ծայրի փոքրիկ փուչիկը: Այնուհետև սարքը հետ է քաշվում սեղմանի (սֆինկտերի) մկանների միջով: Այս միջոցառումը թույլ է տալիս ձեր բժշկին չափել մկանների կոորդինացումը, որոնք օգտագործում եք ձեր աղիքները դատարկելու համար:
- Հետանցքային սեղմանի մկանային արագության գնահատում (բալոնային էքսպուլսիացիայի թեստ). այս հետազոտությունը, որը հաճախ օգտագործվում է անոռեկտալ մանոմետրիայի հետ մեկտեղ, չափում է այն ժամանակի քանակը, որը ձեզ անհրաժեշտ է դուրս մղելու ուղիղ աղիքի մեջ տեղադրված ջրով լցված փուչիկը:
- Հաստ աղիքով սննդախույսի շարժման գնահատում (հաստաղիքային տարանցման հետազոտություն). այս հետազոտության ժամանակ դուք կուլ եք տալիս պատիճ, որը պարունակում է ռադիոակտիվ մարկեր կամ անլար փոքր գրանցող սարք: Հաստ աղիքի միջով պատիճի առաջընթացը գրանցվում է 24-ից 48 ժամվա ընթացքում և տեսանելի է լինում ռենտգենով: Որոշ դեպքերում ձեզ կարող են տալ ռադիոածխածին-ակտիվացված սնունդ, և հատուկ տեսախցիկը գրանցում է դրա առաջ շարժումը (սցինտիգրաֆիա): Ձեր բժիշկը կփնտրի աղիքային մկանների դիսֆունկցիայի նշանները և կգնահատի, թե որքան լավ է սնունդը շարժվում ձեր հաստ աղիքի միջով:
- Ուղիղ աղիքի ռենտգեն կղազատման ընթացքում (դեֆեկոգրաֆիա). այս հետազոտության ընթացքում ձեր բժիշկը բարիումից պատրաստված փափուկ մածուկ է ներմուծում ձեր ուղիղ աղիքի մեջ: Այնուհետև դուք կղազատում եք բարիումի մածուկն այնպես, ինչպես կղանքը: Բարիումը երևում է ռենտգենի վրա և կարող է բացահայտել պրոլապս կամ մկանների աշխատանքի և մկանների համակարգման հետ կապված խնդիրներ:
- ՄՌՏ դեֆեկոգրաֆիա. այս հետազոտության ընթացքում, ինչպես բարիումային դեֆեկոգրաֆիայում, բժիշկը ձեր ուղիղ աղիքի մեջ կներմուծի կոնտրաստ գել: Դուք այնուհետև կղազատում եք գելը: ՄՌՏ սքաները կարող է պատկերել և գնահատել կղազատման մկանների աշխատանքը: Այս հետազոտությունը նաև կարող է ախտորոշել փորկապություն առաջացնող այնպիսի խնդիրներ, ինչպիսիք են ռեկտոցելեն կամ ուղիղ աղիքի պրոլապսը:
Հոդվածը տեղադրվել է՝ 11-05-2021 վերանայվել է՝ 10-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
