Բարձր ջերմություն. ախտանիշներ

4 րոպե

Մարմնի ջերմաստիճանը մի փոքր տարբերվում է անձից անձից և օրվա տարբեր ժամերին:

Միջին ջերմաստիճանը ավանդաբար սահմանվել է որպես 37° C (98,6 F): Բերանային ջերմաչափով (օրալ ջերմաստիճան) 37,8° C (100 F) կամ ավելի բարձր ջերմաստիճանը սովորաբար համարվում է ջերմություն:

Կախված նրանից, թե ինչն է առաջացնում ջերմություն, ջերմության այլ գանգատները և ախտանիշներ կարող են ներառել՝

• քրտնարտադրություն
• դող և սարսուռ
• գլխացավ
• մկանային ցավեր և մարմնի ջարդվածության զգացում
• ախորժակի կորուստ
• դյուրագրգռություն
• ջրազրկում
• ընդհանուր թուլություն:

6 ամսականից մինչև 5 տարեկան երեխաները կարող են ունենալ ջերմային (ֆեբրիլ) ցնցումներ: Նման ցնցումներ տարած մանկահասակ երեխաների շուրջ 1/3-ը հաջորդ 12 ամսվա ընթացքում ունենում են մեկ այլ նման ցնցում:

Ջերմաստիճանի չափում

Մարմնի ջերմաստիճանը չափելու համար դուք կարող եք ընտրել մի քանի տեսակի ջերմաչափեր, այդ թվում՝ բերանային (օրալ), ուղիղաղիքային (ռեկտալ), ականջային (տիմպանիկ) և ճակատային (քունքային զարկերակի):

Բերանային և ուղիղաղիքային (հետանցքային) ջերմաչափերը սովորաբար ապահովում են մարմնի հիմնային (բազալ) ջերմաստիճանի առավել ճշգրիտ չափումը: Ականջային կամ ճակատային ջերմաչափերն ավելի հարմարավետ են, սակայն՝ նվազ ճշգրիտ:

Նորածինների մոտ ուղիղաղիքային ջերմաստիճանը, եթե դա հնարավոր է չափել, որոշակիորեն ավելի ճշգրիտ է: Ձեր բժշկին ջերմաստիճանի մասին տեղեկացնելիս նշեք և ցուցանիշը, և օգտագործվող ջերմաչափի տեսակը:

Հնարավորության դեպքում խորհուրդ է տրվում չափումը կատարել թվային, այլ ոչ թե սնդիկային ջերմաչափով։

Թևատակի ջերմաստիճանը չափելու համար՝

• թևատակը մաքրեք-չորացրեք մաքուր սրբիչով
• բարձրացրեք աջ կամ ձախ ձեռքը և ջեմաչափը դրեք թևատակի շրջանում՝ չափիչ ծայրը հպելով թևատակի մաշկին
• զգուշությամբ իջեցրեք ձեռքը և հպեք ձեր մարմնին՝ կիպ պահելով ջերմաչափն անութային փոսում
• պահեք ջերմաչափն այնքան, որքան նշված է տվյալ ջերմաչափի պիտակում
• հանեք ջերմաչափը և կարդացեք ձեր մարմնի ջերմաստիճանի ցուցմունքը։

Ե՞րբ դիմել բժշկին

Ջերմությունն ինքնին չի կարող խիստ անհանգստության կամ բժիշկ կանչելու պատճառ լինել: Այնուամենայնիվ, կան որոշ իրավիճակներ, երբ դուք պետք է բժշկական խորհրդատվություն փնտրեք ձեր նորածնի, ձեր երեխայի կամ ինքներդ ձեզ համար:

Նորածիններ

Ջերմությունն անհանգստության հատուկ պատճառ է համարվում, եթե գրանցվում է նորածինների և մանկահասակ երեխաների մոտ: Զանգահարեք ձեր երեխայի բժշկին, եթե ձեր երեխան՝

• 3 ամսականից փոքր է և ռեկտալ ջերմաստիճանը 38° C (100,4 F) կամ ավելի բարձր է:
• 3-ից 6 ամսական է և ռեկտալ ջերմաստիճանը 38,9° C-ից (102 F) բարձր է կամ ունի ավելի ցածր ջերմաստիճան, բայց թվում է անսովոր դյուրագրգիռ, դանդաղկոտ կամ ունի անհարմարավետության այլ նշաններ:
• 7-ից 24 ամսական է և ռեկտալ ջերմաստիճանը ավելի բարձր է, քան 38,9° C (102 F), որը տևում է մեկ օրից ավելի, թեև այլ ախտանշաններ չի ցուցաբերում: Եթե ձեր երեխան ունի նաև այլ գանգատներ և ախտանշաններ, ինչպիսիք են քթահոսությունը, հազը կամ փորլուծությունը, կարող եք զանգահարել ավելի շուտ:

Երեխաներ

Հավանաբար, անհանգստանալու պատճառ չկա, եթե ձեր երեխան ջերմություն ունի, բայց արձագանքում է ձեզ՝ տեսողական կապ է հաստատում ձեզ հետ և արձագանքում է ձեր դեմքի արտահայտություններին և ձեր ձայնին: Ձեր երեխան կարող է նաև հեղուկներ խմել և խաղալ:

Զանգահարեք ձեր երեխայի բժշկին, եթե ձեր երեխան՝

• նվաղած է, շփոթված է կամ թույլ տեսողական կապ ունի ձեզ հետ
• դյուրագրգիռ է, բազմիցս փսխում է, ունի ուժեղ գլխացավ, կոկորդի ցավ, ստամոքսի ցավ կամ այլ ախտանիշներ, որոնք մեծ անհանգստություն են առաջացնում
• ջերմություն է ունենում շոգ մեքենայում մնալուց հետո, որը պահանջում է անհետաձգելի բուժօգնություն
• ունի ջերմություն, որը տևում է երեք օրից ավելի
• ունի ջերմության հետ կապված ցնցումներ. զանգահարեք 1-03, եթե նոպան տևում է ավելի քան հինգ րոպե, կամ ձեր երեխան արագ չի վերականգնվում:

Հարցրեք ձեր բժշկից, թե ինչպես վարվել հատուկ իրավիճակներում, օրինակ, երբ ձեր երեխան ունի իմունային համակարգի խնդիրներ կամ նախկինում հիվանդություն է ունեցել:

Չափահասներ

Զանգահարեք ձեր բժշկին, եթե ձեր ջերմաստիճանը 39.4° C (103 F) կամ ավելի բարձր է: Անհապաղ դիմեք բժշկական օգնության, եթե այս հանգատներից կամ ախտանիշներից որևէ մեկը ուղեկցում է ձեր տենդին՝

• ուժեղ գլխացավ
• ցան, հատկապես, եթե այն արագորեն տարածվում է
• պայծառ լույսի նկատմամբ արտասովոր զգայունություն
• պարանոցի կարկամություն և ցավ, երբ ձեր գլուխը թեքում եք առաջ
• հոգեկան շփոթություն, տարօրինակ վարքագիծ կամ փոփոխված խոսք
• համառ փսխում
• դժվարաշնչություն, հևոց կամ կրծքավանդակային ցավ
• որովայնային ցավ
• ցավեր միզելիս (դիզուրիա)
• ջղաձգումներ (կոնվուլսիաներ) կամ ցնցումներ: