Սրտամկանի ինֆարկտ. բուժում

Սրտամկանի ինֆարկտ. բուժում

Սրտամկանի ինֆարկտով բազմաթիվ մարդիկ իրենց կյանքից զրկվում են ուշացած ախտորոշման և բուժման պատճառով:

Անհապաղ զանգեք 1-03 և կանչեք շտապբուժօգնություն, եթե կասկածում եք, որ ձեզ մոտ կամ մեկ այլ անձի մոտ զարգացել է սրտամկանի սուր ինֆարկտ:

Որքան շուտ սկսվեց սրտամկանի ինֆարկտի բուժումը, այնքան կմեղմանա հիվանդի կյանքի սպառնալիքը և կնվազի սուր բարդությունների զարգացման ռիսկը:

Ձեզ ենք ներկայացնում սրտամկանի ինֆարկտի ժամանակակից բուժման հիմնական ուղղությունները:

Հիվանդանոցային բուժման անհրաժեշտությունը

Սրտամկանի ինֆարկտից հետո յուրաքանչյուր րոպե ավելի շատ սրտային հյուսվածք է վնասվում կամ մեռուկանում: Պսակային զարկերակներով սրտամկանի արյան հոսքի արագ վերականգնումը թույլ է տալիս կանխարգելել կամ նվազագույնի հասցնել սրտի վնասումը:

Դեղեր

  • Ասպիրին. 1-03-ի օպերատորը կարող է ձեզ խորհուրդ տալ, որ անհապաղ՝ մինչև շտապբուժօգնության անձնակազմի ժամանումն ընդունեք Ասպիրինի մեկ հաբ: Ասպիրինը նվազեցնում է արյան մակարդելիությունը և օգնում նեղացած պսակային զարկերակով արյան հոսքի պահպանմանը:
  • Թրոմբոլիտիկներ. այս դեղերն օգնում են պսակային զարկերակը խցանող և սրտամկանի արյունամատակարմանը խոչընդոտող արյան մակարդուկի (թրոմբ) տարալուծմանը: Թրոմբոլիզի համար նշանակվող դեղերն արդյունավետ են, եթե ներարկվում են ինֆարկտի առաջացման առաջին մի քանի ժամվա ընթացքում:
  • Հակաթրոմբոցիտար դեղեր. անհետաձգելի բուժօգնության պալատում ձեզ կարող են տալ այլ դեղեր, որոնք հայտնի են որպես արյան թիթեղիկների միաձուլումը արգելակող դեղեր (թրոմբոցիտների ագրեգացիայի ինհիբիտորներ, օրինակ՝ Կլոպիդոգրել): Դրանք կարող են օգնել նոր մակարդուկի առաջացման և առաջացած մակարդուկի չափերի մեծացման կանխարգելմանը:
  • Այլ հակամակարդիչներ. ձեզ կարող են նշանակվել արյունը «ջրիկացնող» այլ դեղեր ևս, օրինակ՝ Հեպարին, որն արյունը դարձնում է ավելի քիչ թանձր և կրճատում մակարդուկների առաջացման հավանականությունը: Հեպարինը կարող է տրվել որպես ներերակային կամ ենթամաշկային ներարկում:
  • Ցավազրկողներ. սաստիկ ցավերի դեպքում ձեզ կարող է տրվել ուժեղ (թմրաբեր) ցավազրկող, օրինակ՝ Մորֆին:
  • Նիտրոգլիցերին. այս դեղամիջոցը, որը սովորաբար նշանակվում է կրծքահեղձուկի բուժման մեջ, կարող է օգնել սրտի արյունամատակարարման բարելավմանը՝ լայնացնելով արյունատար անոթները:
  • Բետա-բլոկատորներ. ադրենալինային ընկալիչների բետա-պաշարիչներն օգնում են սրտամկանի թուլացմանը, դանդաղեցնում սրտազարկը և նվազեցնում արյան ճնշումը, որոնք իրենց հերթին հեշտացնում են սրտի աշխատանքը: Բետա-բլոկատորները կարող են սահմանափակել սրտամկանի վնասման չափը և կանխարգելել հետագա ինֆարկտները:
  • ԱՓՖ արգելակիչներ. անգիոտենզին-փոխակերպող ֆերմենտի (ԱՓՖ) ինհիբիտորները նվազեցնում են արյան ճնշումը և թուլացնում սրտի լարվածությունը:
  • Ստատիններ. այս դեղերը (օրինակ՝ Ատրվաստատին, Սիմվաստատին և այլն) օգնում են ձեր արյան խոլեսթերինի կարգավորմանը (նվազեցմանը):

Վիրահատական և այլ միջամտություններ

Անգիոպլաստիկա և ստենտի տեղադրում

Անգիոպլաստիկայի էությունը նեղացած պսակային զարկերակի մեխանիկական լայնացումն է, որի շնորհիվ վերականգնվում է սրտամկանի նորմալ արյունամատակարարումը: Անգիոպլաստիկայից հետո հատուկ մեղաղական պարույրը (ստենտ) տեղադրվում է նեղացած պսակային զարկերակի մեջ, որն այդ անոթը պահում է մշտապես «բաց» վիճակում և չի թողնում, որ կրկին «փակվի»:

Անգիոպլաստիկայի արդյունավետությունը շատ ավելի բարձրանում է, եթե իշեմիայի ենթարկված սրտամկանը դեռ չի հասցրել մեռուկանալ: Միջամտությունը տևում է 30 րոպեից մինչև 3 ժամ, իրականացվում է ընդհանուր անզգայացման ներքո և դուք որևէ ցավ չեք զգում:

Աորտո-կորոնար շունտավորում

Պսակային անոթի շունտավորումը «մեծ» վիրահատություն է, որի ժամանակ սրտային վիրաբույժը վերցնում է ձեր առողջ երակի ինչ-որ մի հատված (սովորաբար՝ ստորին վերջույթներից) և մի ծայրը կարում աորտային, իսկ երկրորդ ծայրը՝ պսակային զարկերակի ճյուղին՝ նեղացումից ներքև: Այսպիսով, արյան համար ստեղծվում է լրացուցիչ հոսքագիծ՝ շրջանցելով պսակային զարկերակի խցանված հատվածը:

Դեֆիբրիլյատոր

Դեֆիբրիլյատորը սրտամկանի ինֆարկտի մահվան բերող բարդության՝ փորոքների ֆիբրիլյացիայի կամ սրտի կանգի բուժման ծայրահեղ միջոց է:

Իմպլանտացվող սրտային դեֆիբրիլյատոր

Սրտամկանի ինֆարկտից վերականգնվելուց հետո երբեմն զարգանում և կայուն կերպով պահպանվում են սրտի ռիթմի տարբեր խանգարումներ (առիթմիա), որոնք կարող են ցանկացած պահի սրանալ և դառնալ հիվանդի կյանքին սպառնացող: Իմպլանտացվող սրտային դեֆիբրիլյատորների նպատակն այսպիսի դրվագներում սրտի ռիթմը վերականգնելն է:

Սրտային վերականգնում (ռեաբիլիտացիա)

Բազմաթիվ հիվանդանոցներ առաջարկում են ծրագրեր, որոնք սովորաբար սկսվում են հիվանդանոցում և շարունակվում տուն վերադառնալուց հետո շաբաթներ կամ մի քանի ամիս: Նման ծրագրերը սովորաբար ներառում են 4 հիմնական ոլորտներ՝ դեղեր, ապրելակերպի փոփոխություններ, հուզական խնդիրների կանխարգելում ու կառավարում և նորմալ առոօրյա կյանքին աստիճանաբար վերադառնալու հմտություններ:

Շատ կարևոր է, որ ինֆարկտից հետո դուք մասնակցեք նման ծրագրերին, քանի որ ապացուցվել է, որ ճիշտ վերականգնումը բարձրացնում է հետինֆարկտային ապրելիությունը և կանխարգելում մեկ այլ ինֆարկտի կամ բարդությունների զարգացումը:

Ապրելակերպի առողջացում

Առողջ ապրելակերպի միջոցառումները ոչ միայն կանխարգելում են ինֆարկտի ռիսկը, այլև բարերար ազդեցություն թողնում ինֆարկտի ենթարկված սրտամկանի վերականգնման վրա և նպաստում բուժմանը:

Այս նպատակներից ելնելով, եթե ձեզ մոտ ախտորոշվել է սրտամկանի ինֆարկտ, դուք կարող եք՝

Եթե ունեք դիաբետ (շաքարախտ), պետք է բժշկի հսկողությամբ կայունացնեք ձեր արյան գլյուկոզի մակարդակը նորմալ՝ ոչ-դիաբետիկ միջակայքում:

Հիշեք, որ եթե դուք արդեն ունեցել եք ինֆարկտ, ապա ապագայում երկրորդ ինֆարկտն ունենալու ռիսկը բարձրացած է: Ուստի, ծանոթացեք սրտամկանի ինֆարկտի նշաններին, որ նախատեսեք, թե ինչ քայլերի եք դիմելու, եթե հանկարծ այն կրկնվի:

Հոդվածը վերանայվել է՝ 30-03-2021