Թոքի քաղցկեղ. ախտորոշում

Թոքի քաղցկեղ. ախտորոշում

Թոքի քաղցկեղը հայտնաբերելու կամ ախտորոշելու համար բժիշկներն տարբեր հետազոտություններից։

Առողջ մարդկանց շրջանում թոքի քաղցկեղի սքրինինգ

Թոքի քաղցկեղի բարձրացած ռիսկով մարդիկ կարող են անցնել ամենամյա սքրինինգ ցածր դոզավորման համակարգչային տոմոգրաֆիայով (ԿՏ): Թոքի քաղցկեղի սքրինինգը սովորաբար խորհուրդ է տրվում մեծ տարիքով չափահաս մարդկանց, ովքեր բազմաթիվ տարիների մոլի ծխող են կամ ծխախոտից հրաժարվել են վերջին 15 տարվա ընթացքում:

Քննարկեք թոքի քաղցկեղի ռիսկերը բժշկի հետ և միասին որոշեք թե արդյոք թոքի քաղցկեղի սքրինինգը ձեզ ցուցված է:

Թոքի քաղցկեղի ախտորոշիչ թեստեր

Եթե կա թոքի քաղցկեղի կասկածի որևէ պատճառ, բժիշկը կառաջարկի մի շարք թեստեր, որ հայտնաբերի քաղցկեղային բջիջներ կամ ժխտի այլ հիվանդությունները:

  • Պատկերման հետազոտություններ. թոքերի սովորական ռենտգենը կարող է հայտնաբերել ոչ նորմալ զանգված կամ հանգույց: ԿՏ սքանը կարող է հայտնաբերել թոքերի փոքր ախտահարումները, որոնք կրծքավանդակի ռենտգենով տեսանելի չեն:
  • Խորխի բջջաբանական քննություն (ցիտոլոգիա). եթե ունեք խորխով հազ, խորխի մանրադիտակային հետազոտությամբ երբեմն կարող են հայտնաբերվել քաղցկեղային բջիջներ:
  • Հյուսվածքի նմուշ (բիոպսիա). բիոպսիայի միջոցով կարող են նմուշառվել ոչ նորմալ բջիջներ պարունակող հյուսվածք, որը ուղարկվի լաբորատոր քննության: Բիոպսիան կարող է իրականացվել բրոնխոսկոպիայով (բրոնխների էնդոսկոպիա), մեդիաստինոսկոպիայով (միջնորմի էնդոսկոպիա) կամ ռենտգեն հսկողությամբ կրծքավանդակի պատի մեջով ներմուծված ասեղով (ասպիրացիա): Բիոպսիոն նմուշ կարող է վերցվել անմիջապես թոքերից, ավշային հանգույցներից կամ քաղցկեղի տարածման այլ շրջաններից, օրինակ՝ լյարդից: Այսպիսի հետազոտությունը թույլ է տալիս ոչ միայն հաստատել թոքի քաղցկեղի ախտորոշումը, այլև որոշել քաղցկեղի տեսակը: Վերջինս թույլ է տալիս գնահատել հիվանդության ելքը և բուժումը դարձնել ավելի նպատակասլաց:

Թոքի քաղցկեղի աստիճանը գնահատող թեստեր

Երբ թոքի քաղցկեղի ախտորոշումն այլևս կասկած չի հարուցում, բժիշկն անցում է քաղցկեղի աստիճանը (փուլը) որոշելու գործընթացին: Քաղցկեղի փուլն իմանալը օգնում է բժշկին ընտրելու ամենահարմար բուժումը:

Քաղցկեղի փուլի որոշումը ներառում է պատկերման հետազոտություններ, որոնք տվյալներ են տրամադրում քաղցկեղի թոքերի սահմանն անցնելու մասին՝ ԿՏ, մագնիսա-ռեզոնանսային տոմոգրաֆիա (ՄՌՏ), պոզիտրոնային էմիսիոն տոմոգրաֆիա (ՊԷՏ) և ոսկրի սքանավորում:

Հոդվածը վերանայվել է՝ 09-06-2021