Թոքի քաղցկեղ. բուժում

Թոքի քաղցկեղ. բուժում
Անգլերեն անվանումը՝ Lung Cancer Treatment

Թոքի քաղցկեղի բուժումը կախված է հիվանդության ծանրության աստիճանից (փուլից), հիվանդի ընդհանուր առողջական վիճակից, շնչառության խանգարման աստիճանից և բուժվողի նախապատվությունից:

Թոքի քաղցկեղի բուժման հիմնական մեթոդներն են վիրահատությունը, ճառագայթային բուժումը և քիմիոթերապիան (հակաքաղցկեղային դեղեր):

Որոշ դեպքերում նույն հիվանդին նշանակվում է բուժման տարբեր մեթոդներ՝ զուգակցված կամ հաջորդաբար:

  • Ոչ մանրբջջային թոքի քաղցկեղի բուժումը կարող է անցկացվել վիրահատությամբ, ճառագայթումով կամ քիմոթերապիայով: Այլ մեթոդներից են՝
    • ջերմային աբլացիա, երբ ասեղը ներմուծվում է քաղցկեղային հյուսվածքի մեջ և տաքացվում, որ քայքայվեն քաղցկեղային բջիջները
    • իմունաբուժում, երբ դեղերի օգնությամբ խթանվում է քաղցկեղի դեմ պայքարող իմունային համակարգը
    • թիրախային բուժում, երբ նշանակվում են ժառանգական մուտացիայի ենթարկված քաղցկեղային բջիջները ոչնչացնող դեղեր:
  • Մանրբջջային թոքի քաղցկեղի ժամանակ սովորաբար նշանակվում է քիմիոթերապիա: Որոշ դեպքերում քիմոթերապիան կարող է զուգակցվել կանխարգելիչ ճառագայթային բուժման հետ (օրինակ՝ մի թոքում քաղցկեղ լինելու դեպքում ամբողջ կրծքավանդակի և ուղեղի ճառագայթային բուժում՝ մետաստազները կանխելու նպատակով):
  • Մեզոթելիոման հազվադեպ է հնարավոր լինում վիրահատական ճանապարհով հեռացնել: Նման դեպքերում ընտրվում են բուժման այլ տարբերակներ:
  • Թոքի քաղցկեղի բուժումը ներառում է նաև միջոցներ, որոնք ուղղված են հիվանդության ախտանիշների մեղմացմանը:

Վիրահատություն

Սա ներառում է թոքի մասնահատումը, այսինքն թոքի այն մասի վիրահատական հեռացումը, որտեղ տաղակայված է քաղցկեղը: Որոշ դեպքերում անհրաժեշտություն է ծագում կատարելու ամբողջական մեկ թոքի հեռացում:

Թոքերի հետ կապված վիրահատությունները մտնում են կրծքային վիրաբուժության ոլորտում և իրենցից ներկայացնում են ընդհանուր անզգայացման ներքո իրականացվող մեծ և ծավալուն վիրաբուժական միջամտություններ: Այնուամենայնիվ, ոչ բոլոր դեպքերում է, երբ վիրահատական բուժումը ցուցված է և կարող է արդյունավետ լինել: Որոշ դեպքերում վիրահատությունն անհնարին կարող է դառնալ նաև ծխախոտի ծխի առաջացրած թոքային հյուսվածքի խորը ախտահարման և թոքերի էմֆիզեմայի պատճառով:

Ճառագայթային բուժում

Ճառագայթային բուժման նպատակը բարձր քանակի ճառագայթմամբ քաղցկեղային բջիջները ոչնչացնելն է: Այս բուժումը կարող է որոշակի օգտակարություն դրսևորել թոքի քաղցկեղի վաղ փուլերում, երբ առաջնային օջախը չի հասցրել տարածվել կամ բարդանալ հեռավոր մետաստազներով: Բուժումը սովորաբար կազմակերպվում է մի քանի փուլով և տևում շաբաթներ:

Ճառագայթային բուժումը վնասաբեր չէ և ձեզ չի դարձնում ռադիոակտիվ, թեև բուժումից հետո դուք կարող եք զգալ ընդհանուր թուլություն, իսկ ճառագայթվող շրջանների մաշկը կարող է թխանալ ու նմանվել արևարյուքին:

Քիմիոթերապիա

Քիմիոթերապիայի էությունը հակաքաղցկեղային դեղեր ստանալն է: Այս դեղերը սովորաբար նշանակվում են ներերակային ճանապահով, հազվադեպ՝ խմելու ձևով:

Հակաքաղցկեղային դեղերի ամենամեծ թերությունն այն է, որ դրանք ազդում են ոչ միայն քաղցկեղային, այլ նաև առողջ բջիջների վրա՝ առաջացնելով մի շարք կողմնակի ազդեցություններ՝ ընդհանուր թուլություն, մազաթափություն և այլն:

Հոդվածը վերանայվել է՝ 12-05-2019