Ախտորոշում - Պրեդիաբետ

Ամերիկյան դիաբետի ասոցիացիան (ADA)​ խորհուրդ է տալիս, որ չափահասների մեծամասնության համար դիաբետի սքրինինգը սկսվի 35 տարեկանից:

ADA-ն խորհուրդ է տալիս դիաբետի սքրինինգ կատարել մինչև 35 տարեկանը, եթե ունեք ավելորդ քաշ և նախադիաբետի կամ 2-րդ տիպի դիաբետի լրացուցիչ ռիսկի գործոններ:

Եթե ունեցել եք գեստացիոն (հղիության) դիաբետ, ձեր բժիշկը, հավանաբար, կստուգի ձեր արյան շաքարի մակարդակը առնվազն երեք տարին մեկ անգամ:

Նախադիաբետի հայտնաբերման համար կիրառվում են մի քանի արյան թեստեր:

Գլիկոզիլացված հեմոգլոբինի (HbA1c) թեստ

Այս թեստը ցույց է տալիս ձեր արյան շաքարի միջին մակարդակը վերջին 2-3 ամսվա ընթացքում:

Ընդհանուր առմամբ՝

• 5,7%-ից ցածր մակարդակը նորմալ է
• 5,7%-ից մինչև 6,4%-ը ախտորոշվում է որպես նախադիաբետ
• երկու առանձին թեստերի դեպքում 6.5% կամ ավելի բարձր մակարդակը վկայում է դիաբետի մասին:

Որոշ վիճակներ կարող են HbA1c թեստը դարձնել ոչ ճշգրիտ, օրինակ, եթե դուք հղի եք կամ ունեք հեմոգլոբինի ոչ սովորական ձև:

Իմացե՛ք ավելին գլիկոհեմոգլոբինի թեստի մասին:

Քաղցած վիճակում արյան շաքարի թեստ

Արյան նմուշը վերցվում է այն բանից հետո, երբ դուք չեք կերել առնվազն ութ ժամ կամ մեկ գիշերվա ընթացքում (քաղցած եք):

Արյան շաքարի ցուցանիշները ներկայացվում են միլիմոլներով մեկ լիտր (մմոլ/լ) կամ շաքարի միլիգրամներով մեկ դեցիլիտր (մգ/դլ) կամ շաքարի արյան համար: Ընդհանուր առմամբ, քաղցած փորին՝

• 5,6 մմոլ/լ-ից ցածր (100 մգ/դլ) մակարդակը նորմալ է
• 5,6-ից 6,9 մմոլ/լ (100-ից մինչև 125 մգ/դլ) ախտորոշվում է որպես նախադիաբետ
• երկու առանձին թեստերի դեպքում 7,0 մմոլ/լ (126 մգ/դլ) կամ ավելի բարձր մակարդակը ախտորոշվում է որպես դիաբետ:

Իմացե՛ք ավելին արյան գլյուկոզի թեստի մասին:

Բերանային (օրալ) գլյուկոզի տոլերանտության թեստ

Այս թեստը ավելի քիչ է կիրառվում, քան մյուսները, բացառությամբ հղիության ընթացքում: Դուք պետք է մի գիշերվա ընթացքում քաղցած մնաք, այնուհետև քաղցր հեղուկ խմեք ձեր բժշկի գրասենյակում կամ լաբորատոր կենտրոնում: Արյան շաքարի մակարդակը պարբերաբար ստուգվում է հաջորդ երկու ժամվա ընթացքում:

Ընդհանուր առմամբ՝

• 7,8 մմոլ/լ (140 մգ/դլ-ից) ցածր մակարդակը համարվում է նորմալ
• 7,8-ից 11,0 մմոլ/լ (140-ից 199 մգ/դլ) համապատասխանում է նախադիաբետին
• երկու ժամ հետո 11,1 մմոլ/լ (200 մգ/դլ) կամ ավելի բարձր մակարդակը վկայում է դիաբետի մասին:

Եթե ունեք նախադիաբետ, ձեր բժիշկը սովորաբար տարին մեկ անգամ ստուգում է ձեր արյան շաքարի մակարդակը:

Իմացե՛ք ավելին օրալ գլյուկոզի տոլերանտության թեստի մասին:

Երեխաները և նախադիաբետի հետազոտումը

2-րդ տիպի շաքարախտը ավելի տարածված է դառնում երեխաների և դեռահասների շրջանում, հավանաբար մանկական գիրության աճի պատճառով:

ADA-ն խորհուրդ է տալիս նախադիաբետի թեստ անցկացնել այն երեխաների համար, ովքեր ունեն ավելորդ քաշ կամ գեր են և ունեն մեկ կամ մի քանի այլ տեսակի դիաբետի ռիսկի գործոններ, ինչպիսիք են՝

• 2-րդ տիպի դիաբետի ընտանեկան պատմություն
• ռասայի կամ էթնիկ պատկանելությունը կապված է ռիսկի բարձրացման հետ
• ցածր ծննդյան քաշ
• գեստացիոն (հղիության) դիաբետ ունեցող մորից ծնված երեխաներ:

Նորմալ, նախադիաբետի և դիաբետի մասին վկայող արյան շաքարի մակարդակի միջակայքերը երեխաների և չափահասների համար նույնն են:

Նախադիաբետ ունեցող երեխաները պետք է 2-րդ տիպի դիաբետի համար ստուգվեն ամեն տարի կամ ավելի հաճախ, եթե երեխայի մոտ նկատվում է քաշի փոփոխություն կամ ի հայտ են գալիս դիաբետի գանգատներ կամ ախտանիշեր, ինչպիսիք են ուժգնացած ծարավը, միզարձակման ավելացումը, հոգնածությունը կամ մշուշոտ տեսողությունը: